MATEO 23:27-32. Nganong
magtakoban man kita sa atong kaugalingon? Sa libro nga “Why Am I Afraid To Tell
You Who I Am?” si John Powell miingon nga ang hinungdan sa atong
pagpakaaron-ingnon mao ang “fear of rejection”. Magbutang kita og maskara sa
atong kaugalingon tungod kay mahadlok man kita nga dili na moangay kanato ang
atong mga higala kon mahibaw-an nila ang tinuod natong pagkatawo. Sa ebanghelyo
gisaway ni Jesus ang pagtakoban sa mga Pariseo dili aron insultohon kondili
aron hagiton sila sa pagbag-o sa ilang kaugalingon. Kon ugaling adunay mga tawo
nga magsaway sa atong mga kahuyang ug kakulangon, o kaha magbutyag sa atong
maskara, dili nato sila kasuk-an. Hinoon, ato silang pasalamatan tungod kay basi’g
gigamit lamang sila sa Ginoo aron kita mausab o mabag-o sa atong pagkatawo.
