28TH SUNDAY IN ORDINARY TIME (A)

MATEO 22:1-14. Nagsul-ob ba kita sa bisti nga angay alang sa mga sumusunod ni Kristo? Adunay usa ka hari nga nagdapit sa tanan, maayo ug daotan, nga motambong sa kombira sa kasal sa iyang anak nga lalaki. Sa mga nanambong, nakabantay ang hari nga dihay usa ka bisita nga wala magsul-ob og bisti sa kasal. Nasuko siya pag-ayo ug iya kining gipalabay ngadto sa kangitngit. Sa samang paagi, ang Dios Amahan nagdapit kanatong tanan nga mosalmot sa kombira sa iyang Anak nga si Hesus. Kitang tanan pwede nga moapil, apan gilauman kita nga magsul-ob sa saktong bisti. Ang “bisti” nga gihisgutan dinhi dili materyal kondili espiritwal. Ang “bisti sa kasal” mao ang mga Kristohanong mithi sa kaayo, kamapaubsanon, kamanggihatagon ug kamaloloy-on. Kon wala kita niini, dili kita angayan nga makig-uban sa Dios didto sa Langit.