30TH SUNDAY IN ORDINARY TIME (YEAR A)

MATEO 22:34-40. Unsa may bag-o sa kasugo-an ni Kristo? Ngadto sa tawo nga nangutana unsa ang pinakadakong sugo, si Hesus nitubag, “Higugmaa ang Ginoo nga imong Dios sa tibuok mong kasingkasing, . . . kalag, ug . . . hunahuna.” Dili kini bag-o sa dalunggan sa mga Hudiyo. Ang Balaod nagsugo niini diha sa Deuteronomio 6:5. Ug kada adlaw balikbalikon kini sa paglitok sa mga maampoong Hudiyo. Apan, ang maong sugo nahatagan og bag-ong tono tungod kay gisumpayan kini ni Kristo sa nahisulat sa Levitico 19:18: “Higugmaa ninyo ang inyong isigkatawo sama sa kaugalingon.” Sa paghiusa ning duha ka kasugoan, gipasabot ni Kristo nga ang atong gugma sa Dios mahimong makahuloganon kon kita nahigugma sa isigkaingon. Ang moingon, “Gihigugma ko ang Dios”, pero wala mahigugma sa isigkatawo, bakakon.