LUKAS 12:1-7. Unsa may nakangil-ad sa pagpakaaron-ingnon? Ang
usa ka maayong buhat, sama sa paghatag og limos o pagtabang sa kabos, mahimong
daotan kon kini atong buhaton nga pakitang-tao lamang. Bisan gani ang pagsimba
mawad-an og bili kon kini atong gihimo aron lang daygon. Ang pagpakaaron-ingnon
usa ka matang sa pagpangilad sa isigkatawo. Kasagaran, ang pagpakaaron-ingnon
ubanan sa daotang katuyoan. Pananglitan, magpakita ka nga matinabangon aron
pili-on sa umaabot nga eleksyon, o kaha, aron magustohan ug pakaslan sa tawo
nga gi-angayan. Si Hesus nagpahimangno: “Bisan unsay gitabonan madayag, ug ang
tanang tinagoan mabutyag.” Sa pagkatinuod, walay malilong sa Dios. Ang tanan sa
atong kasingkasing ug hunahuna Iyang makita. Busa, angay nga magmatinud-anon kita
sa tanan natong mga tinguha ug binuhatan.
No comments:
Post a Comment