MONDAY OF THE 28TH WEEK IN ORDINARY TIME (YEAR A)

LUKAS 11:29-32. Nakita ba nato ang presensya sa Dios diha sa atong palibot? Ang katawhan sa Ninibe naminaw sa tingog sa Dios pinaagi kang Jonas ug nibiya sila sa daotan nilang binuhatan. Ang Rayna sa Habagatan niila sa kaalam sa Dios diha kang Solomon ug nibiyahe siya gikan sa halayong dapit aron lang sa pagpaminaw sa hari. Apan ang mga Hudiyo wala gyod nakakita sa presensya sa Dios diha ni Kristo, nga labaw pa kaayo kagamhanan ni Jonas ug Solomon. Naghatag siya’g kahayag sa mga buta, nagpalakaw sa mga bakol, ug nagbuhi sa mga patay. Apan bisan pa niini ang mga Hudiyo wala gihapon nitoo kang Kristo. Kining ebanghelyo maghagit kanato nga dili na maghulat og mga katalagman ug milagro aron moila sa presensya sa Dios. Sud-ongon lang nato’g maayo ang atong palibot kay kini magpakita sa gahum ug kaalam sa Dios.