FEAST OF SAINT LUKE THE EVANGELIST

LUKAS 10:1-9. Unsa may angay natong makat-onan ning kapistahan ni San Lukas? Si San Lukas nahimugso gikan sa banay nga pagano. Dili ikatingala nga sa iyang sinulat nga ebanghelyo, si San Lukas nagpakita og espesyal nga pagtagad sa mga tawong Hentil o dili Hudiyo og pagtoo. Pananglitan, kang San Lukas lamang nato mabasa ang Sambingay sa Buotan nga Samaritano ug ang sugilanon sa Samaritano nga mapasalamaton kang Hesus human ayoha sa iyang sakit nga sanla. Para sa mga Hudiyo, ang mga Samaritano mahugaw ug walay katakos sa pagbuhat og maayo. Apan, ang ebanghelyo ni San Lukas nagtudlo kanato nga bisan ang mga tawo nga lahi og pagtoo makahimo sa pagsunod sa kabubut-on sa Ginoo. Hinaot nga si San Lukas magdasig kanato sa pagrespeto sa mga tawo nga lahi kanato’g pagtoo.