TUESDAY OF THE 29TH WEEK IN ORDINARY TIME (YEAR A)

LUKAS 12:35-38. Unsaon man nato pagkahimong masaligan nga piniyalan sa Dios? Duha ka butang ang gisugyot ni Hesus diha sa ebanghelyo karon. Una, “ibakos ang inyong bisti”. Sa panahon ni Hesus ang mga sulugoon tag-as og sinina. Ang ilang hawakan kinahanglang ibakos og maayo aron sila makalihok ug makatrabaho. Sa pag-ingon ni Hesus “ibakos ang inyong bisti” buot niyang dasigon ang mga tinun-an nga mag-andam kanunay sa kaugalingon alang sa pag-alagad sa isigka-ingon. Ikaduha, “pasigaa ang inyong lampara”. Ang nagsiga nga lampara maoy gamiton sa pagbuntog sa kangitngit, paglamdag sa palibot, ug pagtultol sa dalan. Sa pagsugo ni Hesus “pasigaa ang inyong lampara” buot niyang hagiton ang mga tinun-an sa pagpakigbatok sa daotan ug sa paghatag og maayong panig-ingnan ngadto sa uban.