SATURDAY OF THE 29TH WEEK IN ORDINARY TIME (YEAR A)

LUKAS 13:1-9. Unsa man ang gilaoman sa Ginoo gikan kanato ning kalibotana? Ang sambingay sa Kahoy’ng Igera nagtudlo nga ang Ginoo, nga maoy tag-iya sa parasan, gusto nga kita mamunga’g maayo – ilabina sa mga bunga sa gugma, kalooy, ug pakigdait. Ang Ginoo masubo kon kita dili magmabungahon, kon kita dili makahimo’g maayo sa katilingban,o kon kita dili makapaambit sa Iyang gugma ngadto sa uban. Ang kahoy nga dili mabungahon angay’ng putlon. Apan ang Tig-amoma sa parasan, nga si Hesus mismo, naghangyo sa Tag-iya nga hatagan og laing kahigayonan ang maong kahoy. Angay kitang magpasalamat kang Hesus tungod sa mga kahigayonan nga iyang gihatag kanato. Apan dili kita angay’ng magpabilin sa pagkadaotan ug pagkawalay bunga. Sugdan na nato ang pagbuhat og maayo karon para sa isigkatawo.