Ex 17:8-13; Tim 3:14-4:2; Lk 18:1-8
Usa ka Domingo
sa buntag, ang pari nagwali mahitungod sa pagkamakanunayon sa pag-ampo. Ang
iyang punto nga kon ang tawo dili mohunong sa pag-ampo, makadawat gayod siya sa
iyang gipangayo. Nadunggan kini ni Nestor, usa ka tawo nga sugarol. Pagkahuman
sa misa, nagpabilin siya sa Simbahan kay nagplano siya nga mangayo ni Lord og
numero para tay-an sa swertres. Sa iyang hunahuna, dili siya mohunong karon og
ampo kay sa giingon na sa pari, basta mangayo sa way hunong, makadawat gayod.
Nagluhod si
Nestor nga nag-ampo atubangan sa imahen ni Hesus. “Lord, hatagi kog tulo ka numero.”
Naudtohan na lang, walay numero nga miabut. “Lord, please taga-i kog numero.”
Nagkurog na ang tuhod ni Nestor, wala gihapoy numero. Hapon na ug kalipungon na
si Nestor sa kakapoy ug kagutom. Unya sa kalit lang, adunay nilabay nga bugnaw
nga hangin ug dihay tingog nga nadungog si Nestor: “4-8-9”. Nabuhi og kalit ang
sugarol ug nisutoy pag-uli.
Pag-abot niya
sa ilang balay, gihurot niya ang tanan niyang natigum nga kwarta og gitaya sa
swertres, numero 4-8-9. Pagkasunod adlaw, sayo nga nibangon si Nestor kay
nag-atang sa mogawas nga numero. Sus kay ang nigawas kay 2-5-6. Posoy si
Nestor! Nakuyapan siya sa kaguol. Sukad ato, dili na siya motoo sa Ginoo. Ug sa
iyang hunahuna, botboton ang mga pari.
Diha sa Ebanghelyo, si Hesus nag-agni sa
iyang mga sumusunod nga magmakanunayon sa pag-ampo. Nasayod ang Ginoo nga
usahay bati-on ang tawo og kalaay sa pagpaabot og tubag sa ilang pag-ampo.
Daghan man gani ang madiskurahe kon dili dayon ihatag sa Ginoo ang ilang
gipangayo sa pag-ampo. Aron ipakita ang kabililhon sa pagkamakanunayon, gihatag
ni Hesus kining sambingay mahitungod sa Huwes ug sa biyuda.
Sa maong sambingay, ang huwes gamhanan
kaayo. Wala siyay kahadlok sa Ginoo ug walay kalooy sa tawo. Sa laing bahin,
ang biyuda kabos ug naglisod pag-ayo. Miduol kining biyuda sa Huwes aron
magpatabang sa iyang kaso. Sa sinugdan wala manumbaling kining huwes. Apan ang
biyuda wala mohunong pagbalikbalik ngadto sa huwes. Ug sa katapusan, nakahukom
ang huwes nga motabang na lang sa biyuda tungod kay sa iyang hunahuna: “Kon
dili ko motabang, dili sab mohunong pagsamok kining biyuda.” Nga sa ato pa,
mitabang kining huwes tungod ug alang sa iyang personal convenience lamang,
dili tungod sa kalooy. Aron pagtudlo sa punto sa sambingay, si Hesus
nagkanayon: “Kon ang salbahis nga huwes nakahunahuna sa paghatag sa gipangayo
sa biyuda tungod sa iyang pagbalikbalik og pangayo og tabang, unsa na lang kaha
ang inyong Amahan sa Langit kon siya makadungog sa mulo sa iyang mga anak dinhi
sa yuta?”
Adunay duha ka butang nga angay natong
ipaklaro dinhi. Una, ang atong Ginoo dili sama sa bangis nga huwes. Dili man
kinahanglan nga mohilak gayod kita og dugo sa iyang atubangan aron iya kitang
dunggon. Ang Dios usa ka buotang Amahan nga nahigugma pag-ayo kanato. Ug sama
sa buotang Amahan dili siya kapuyan sa pagpaminaw sa pamarayeg sa iyang mga
anak. Ikaduha, atong hinumduman nga kita dili sama sa biyuda sa sambingay nga
gipaka-walay bili atubangan sa huwes. Hinoon, kita mga pinalanggang anak sa
Dios ug sa kanunay bililhon sa iyang mga mata.
Apan, human masulti nato kining tanan,
ang mga pangutana nagpabilin: Ngano man nga kinahanglan nato nga maghulat sa
tubag sa atong pag-ampo? Ngano nga dili man dayon ihatag sa Ginoo ang atong gihangyo?
Ngano man nga adunay pag-ampo nga dili tubagon sa Ginoo bisan gibalikbalik nato
og pangayo? Adunay tubag kining mga pangutana.
Una, posible nga tuyoon sa Ginoo nga
madugay ang tubag sa atong pag-ampo aron sukdon ang atong pagsalig kaniya.
Misalig ba gayod ka sa akong pagka-Dios ug pagka-Amahan? Misalig ba ikaw nga dili taka pasagdan? O
basin nahigugma lang ka nako tungod kay hatagan man ka nako sa tanan mong
gipangayo?
Ikaduha, posible usab nga ipadugay sa
Ginoo ang pagtubag sa atong gipangayo aron nga kita maghatag gayod og bili sa
mga butang nga gikan Kaniya. Tinuod baya nga ang mga butang nga sayon ra nato
makab-ot, dili nato hatagan og bili. Apan ang mga butang nga atong gihagoan, mahimong
bililhon sa atong kinabuhi.
Ikatulo, possible nga ipadugay paghatag
sa Ginoo ang atong gipangayo aron nga mahatagan kitag higayon sa pagtan-aw sa
tinuod ta nga panginahanglan. Kinahanglan ba gayod nato kining mga butanga? O
basin magmalipayon ra kita bisan wala kining atong gipangayo? Basin baya hinoon
og mamahimo kitang hambogero kon atong maangkon kining atong gipangayo sa
Ginoo?
Sa katapusan, maingon nato nga dili
sayon ang pagsabot sa plano sa Ginoo para kanato. Dili man gud nato dayon
makita ang kinatibuk-an sa atong kinabuhi. Ang Dios lamang ang nasayod unsa gayod
ang tinuod nga angay para sa atong kaayohan. Mao kini ang nagpabilin nga hagit
para sa matag usa kanato: Magmakanunayon kita sa pag-ampo. Magmasaligon kita
nga ang Dios Amahan nasayod sa atong tinuod nga panginahanglanon. Ihatag niya
ang tanan nga makatabang sa atong kinabuhi, apan dili niya ihatag ang tanan nga
makadaot kanato.
Pamalandongan nato kini:
1. Unsa man ka makanunayon ang atong
pag-ampo sa Ginoo? Mag-ampo ba kita sa matag adlaw, o sa mga panahon ra nga aduna
kitay pangayoon?
2. Unsa man ang mga butang nga atong
gi-ampo sa Ginoo? Mga tinuod bang panginahanglanon, o kapritso lang?
No comments:
Post a Comment