27TH SUNDAY IN ORDINARY TIME (YEAR A)

Is 5:1-7; Phil 4:6-9; Mt 21:33-43

Diha sa “Sambingay sa mga Saop”, atong masabtan nga ang tag-iya sa parasan mao ang Ginoo. Usa siya ka maayo nga tag-iya tungod kay naglantaw siya sa kaayohan sa iyang gitanum pinaagi sa pagpakoral sa iyang parasan ug sa pagpatukod og tore para sa magbantay niini. Siya usab usa ka masaligon nga tag-iya tungod kay nakahimo man siya sa pagbiya sa iyang parasan sulod sa taud-taud nga panahon.

Ang ubas nga gitanum naghulagway sa katawhan nga pinili sa Dios. Aduna silay kapasidad nga mamungag daghan ug makahatag og maayong abut. Ang tag-iya sa usa ka parasan maglaum og maayong bunga sa iyang gitanum. Ang mga ubas nga dili makahatag og maayong bunga walay kwenta ug angay lamang isalibay ug sunugon. Sa samang paagi, ang Ginoo maglaum kanunay nga ang iyang katawhan mamunga unta og daghang buhat sa gugma, kalooy ug katarong. Kon dili sila makapamunga, dili na usab sila angay nga isipon nga katawhan sa Dios.

Ang mga sulugoon nga gipadala sa tag-iya sa parasan maoy nagrepresentar sa mga propeta sa Daang Kasabutan; sila maoy magsubay kon ang pinanggang katawhan sa Dios namunga og mga maayong buhat. Ang mga saop  mao ang mga Hudiyo ra usab mismo, ilabina ang mga pari ug mga Pariseo; sila maoy gitahasan nga magbantay sa piniling katawhan ug maggiya kanila sa maayong dalan. Diha sa sambingay, ang mga sulugoon nga gipadala aron pagkuha sa bahin sa tag-iya gibugalbugalan, gidagmalan ug gipamatay sa mga saop. Mao usab kini ang gibuhat sa mga Hudiyo ngadto sa mga propeta nga gipadala sa Ginoo.

Ang gipadala nga anak sa tag-iya mao si Hesus. Ang Dios Amahan nagpadala kaniya sa kalibutan aron tapokon ang katawhan nga para kaniya. Kining sambingay gihatag ni Hesus agi og pagpanagna sa iyang umaabut nga kamatayon. Sama sa nahitabo sa mga propeta, siya nga bugtong Anak sa Tag-iya sa parasan, isalikway gihapon sa mga saop ug gani ila pud nga ipapatay.

Sa pagkadungog sa mga pangulong pari ug mga Pariseo niining sambingay, nasabtan nila nga sila ang gipasabut ni Hesus nga daotang mga saop. Ug nangasuko sila pag-ayo kaniya.

Unsa may angay natong makat-onan sa Ebanghelyo karong adlawa?

Una, angay natong hatagan og dakong bili ang pagpangga sa Ginoo kanato. Iya kitang gipili isip iyang katawhan; gihimong usa ka Simbahan; gihatagan og buhing pagtoo; ug gilig-on pinaagi sa mga sakramento ug sa nagkadaiyang apostolado. Gihimo sa Ginoo ang tanan aron lamang kita mabuhi, malig-on, mapanalipdan ug makapamunga og maayo. Ang atong paghatag og bili mapakita diha sa atong pagkooperar sa grasya sa Ginoo. Hinumduman nato nga kita gihatagan sa Ginoo og kagawasan nga mopili o modumili kaniya.

Ikaduha, atong hinumduman nga kita adunay bokasyon nga mahimong buotang saop o trabahante sa Ginoo. Gipiyal sa Ginoo sa matag usa kanato ang kaayohan sa iyang katawhan. Gitahasan kita nga magbuhat kutob sa atong mahimo aron nga ang katawhan sa Dios mabuhi nga malipayon. Kining maong bokasyon gihatag sa espesyal nga paagi ngadto sa mga pangulo sa gobyerno ug sa Simbahan. Sa ilang mga kamot gisangon sa Dios ang dakong tahas nga mag-alagad sa tinuoray sa mga tawo, ilabina sa mga kabos ug dinaugdaug. Sa katapusan sa panahon, matag usa kanato maghatag og kwenta atubangan sa Ginoo kalabut sa atong gipanghimo sa mga ubos natong igsoon.

Ug sa katapusan, angay natong hatagan og bili ang presensya ug tingog sa mga propeta niining modernong panahon. Kinsa man kini sila? Sila kadtong mga tawo (pari, relihiyoso, ug mga laygo) nga walay kahadlok nga moatubang sa tanang katalagman aron lamang mapadayag pinaagi sa pulong ug sa buhat ang mensahe sa gugma nga nagagikan kang Kristo. Pananglitan, usa ka propeta ang atong makita diha sa usa ka pari nga makig-uban sa mga igsoon natong Muslim diha sa dalan aron maghimo og “rally for peace”. Usa usab ka propeta ang atong masinati diha sa usa ka mambabalaod nga makigbatok sa matag “anti-life” nga probiso nga ipasaka sa atong kongreso. Usa usab ka propeta ang atong makita diha sa usa ka doktor o health caregiver nga mopili pagpabilin dinhi sa atong nasud bisan sa gamay nga sweldo aron mag-alagad sa daghang kabos nga Pilipino. Usa usab ka propeta ang katekista o magtutudlo nga mosaka sa mga bukid ug moadto sa gagmay’ng kabaryohan aron lamang magtudlo sa mga bata mahitungod sa moral ug Kristohanon nga kinabuhi.

27TH SUNDAY IN ORDINARY TIME (A)

MATEO 21:33-43. Unsa may gitudlo sa sambingay mahitungod sa Dios ug sa Iyang pagdumala kanato? Ang sambingay naghulagway sa Dios sama sa usa ka Tag-iya sa parasan nga adunay mga saop. Ang parasan maoy hulagway sa kalibotan, samtang ang mga saop mao kitang mga tawo. Ang Dios maamomahon ug masaligon. Gipahiluna ug gikumpleto niya ang kalibotan aron nga kon atimanon sa mga tawo maghatag kini og daghang bunga. Ang Dios masaligon kaayo sa mga tawo. Iyang gipiyal kanila ang kalibotan ug gihatag ang kagawasan sa pagdumala niini. Ang sambingay nagpakita usab sa dakong pasensya sa Dios. Bisan sa kadaotan sa mga tawo, ang Dios naghatag kanila og mga kahigayonan nga mabag-o. Hinaot nga kining sambingay magdasig kanato sa pag-amping sa tanan nga binuhat sa Ginoo, ug dili makapahimo natong abusado.

FEAST OF ST. FRANCIS OF ASSISI (YEAR A)

LUKAS 10:17-24. Unsa man ang atong makat-onan gikan ni San Francisco sa Asis? Si San Francisco nag-ingon: “Napuy-an ko ang mahugaw nga kinabuhi. Kon ang Dios naghimo kanako nga mapuslan, nan bisan kinsa pwede Niyang gamiton sa Iyang katuyoan.” Dinhi gipasabut ni San Francisco nga ang Dios magdapit sa tanan, apil ang mga makasasala, nga mahimo Niyang instrumento sa pagpadayag sa Iyang gugma. Nindot kon matag usa kanato mag-ampo uban ni San Francisco pinaagi sa pag-ingon: “Ginoo, himo-a ako nga instrumento sa Imong kalinaw. Kon dunay pagdinumtanay, patanuma ko’g gugma. Kon dunay napasakitan, padalha ko’g pasaylo. Kon dunay kalibog, pasabwaga ko’g pagtoo. Kon dunay kalisdanan, patanuma ko’g paglaum. Kon dunay kangitngit, padalha ko’g kahayag. Kon dunay kagul-anan, pasabwaga ko’g kalipay.”

FRIDAY OF THE 26TH WEEK IN ORDINARY TIME (YEAR A)

LUKAS 10:13-16. Sa unsa man nga matang sa katawhan ug katilingban kita karon nahiuban? Gisaway ni Hesus ang mga tawo sa Corasin ug Betsaida tungod kay wala sila magpakita og kausaban human sa iyang pagpanudlo ug paghimog mga milagro sa ilang distrito. Wala nila hatagi’g bili ang pagduaw sa Dios kanila. Kining makusganong pagsaway ni Hesus magsilbi nga dakong pahimangno alang kanato karon. Ang mga Pilipino gigasahan sa walay sama kanindot nga pagtoo. Nag-inusara kita nga Kristohanong nasod sa tibuok Asia. Apan makauulaw kaayo nga ning dapita sa kalibotan nailhan kita nga nag-una sa gidaghanon sa “graft and corruption”. Asa man ang atong pagkakristiyano? Unsa man diay bili sa atong Kristohanong edukasyon ug sa atong pagdawat sa mga sakramento?

FEAST OF GUARDIAN ANGELS (YEAR A)

MATEO 18:1-5,10. Kinsa man ang mga Anghel nga Magbalantay ug unsa may ilang papel sa kalibotan? Ang Simbahan nagtudlo nga matag anak sa Dios gibantayan og Anghel, sugod sa pagkahimugso hangtod sa kamatayon. Ang mga Anghel nga Magbalantay maoy magpadayag sa Diosnong gugma ug pag-amoma sa kada tawo. Ang Salmo 91:11 nag-ingon nga “Ang Dios nagsugo sa Iyang mga Anghel aron magbantay kaninyo sa tanan ninyong pagabuhaton.” Sa gagmay pa kita, nakat-on kita sa pag-ampo, “Anghel sa Dios, akong palanggang magbalantay, gihatag ikaw sa Dios kanako tungod sa Iyang gugma, imo akong ubanan kanunay aron lamdagan, bantayan, ug giyahan. Amen.” Gitudloan kita ni Hesus nga maghupot sa hiyas sa mga bata, ug angay lamang nga kita magpadayon sa pag-ampo sa “Anghel kong Magbalantay” matag adlaw.

OCTOBER AS ROSARY MONTH

Ang bulan sa Oktubre giisip sa Simbahan nga Bulan sa Santos nga Rosaryo. Kini wala magpasabot nga kita paampoon sa Rosaryo sulod lamang ning bulana. Gani, gidasig man kita sa pag-ampo sa Rosaryo diha sa matag adlaw. Apan, sa bulan sa Oktubre kita giawhag nga mag-ampo sa Rosaryo isip katilingban diha sa tagsatagsa ka kapilya o Simbahan. Dinhi sa atong parokya, akong gidapit ang tanang matoohon nga maghimo sa prosesyon uban ang imahen sa Mahal nga Birhen ug sa samang higayon mag-ampo sa Rosaryo kada alas 5 sa sayong kabuntagon. Pinaagi niini, atong madasig ang usag-usa ug ang bagang katawhan sa pag-ampo sa Rosaryo.

Dugang pa niini, sa bulan sa Oktubre kita giawhag sa pagpalambo sa atong paagi sa pag-ampo sa Santos nga Rosaryo. Ang Rosaryo dili pag-ampo nga mabalikbalikon lamang (repetitive), kondili pag-ampo nga mapamalandungon (meditative). Ang pagbalikbalik og ampo sa “Amahan Namo” ug “Maghimaya ka Maria” maoy pamaagi sa pagpadayag sa atong walay puas nga gugma sa Dios ug sa Mahal nga Birhen. Dili kita angay’ng maluya o mapul-an sa paglitok niini sama nga dili usab kita angay’ng mapul-an sa pag-ingon og “I love you” sa tawo nga atong gihigugma. Apan, ang pag-ampo sa Rosaryo kinahanglan ubanan kanunay og pamalandong. Mahimo nato kini kon kita dili magdali o magpaspas sa paglitok sa mga pulong sa pag-ampo. Diha sa ebanghelyo ni San Mateo 6:7 si Kristo nagpahimangno kanato nga dili mag-ampo sama sa mga pagano ug mga tigpakaaron-ingnon nga magyawyaw ug magbalikbalik sa mga pulong nga walay kahulogan. Ang mga pulong sa “Amahan Namo” ug “Maghimaya ka Maria” puno sa kahulogan. Dili unta nato kini ampoon sa dinali-an nga paagi.

Ato usab nga hinumduman nga matag misteryo sa Santos nga Rosaryo adunay kalambigitan sa dakong Plano sa Kaluwasan nga gibuhat sa Dios pinaagi ni Kristo. Sa sulod sa Rosaryo anaa si Kristo, ang atong Dios ug Manluluwas, nga nagpakatawo, nagsangyaw, nagpasakit, nagpakamatay, ug nabanhaw alang sa atong kaluwasan. Anaa usab ang Mahal nga Birhen nga gipili sa Langitnong Amahan aron mahimong bililhong kabahin sa kinabuhi sa Iyang Anak ug sa Iyang buhat sa pagpangluwas. Busa, sa sunod nga higayon nga kita mag-ampo sa Santos nga Rosaryo, himoon nato kini sa mapamalandungong paagi. Siguroon nato nga dili kita magdali ug mogahin kita’g mga yugto sa kahilom ug pagpamalandong.