WEDNESDAY OF THE 1ST WEEK OF LENT

LUKAS 11:29-32. UNSA MAN ANG MAKAPANGIL-AD SA USA KA KATILINGBAN? Si Hesus nakatuwaw sa pag-ingon, “Pagkadautan gayod sa katawhan niining panahona!” Nabungat niya kini tungod kay ang mga tawo nidumili sa pagtuo kaniya bisan sa mga milagro ug maayong buhat nga nag-uban sa iyang pagsangyaw. Ang katilingban, o bisan ang pamilya, nga dili moila o dili maminaw sa Dios mapuno gayod sa kadautan. Maghari kanila ang kalaog, kasina, pagdumot, panag-away ug uban pa. Samtang ang katawhan nga moila sa Dios ug modawat Kaniya isip hari sa ilang kinabuhi mapuno sa kalinaw ug grasya. Matod pa sa usa ka magsusulat: “Joy is the infallible sign of the presence of God.” Ning Kwaresma, atong pangayoon sa Dios ang Iyang presensya diha sa atong pamilya ug katilingban, ug diha sa mga panghitabo sa atong kinabuhi. 

TUESDAY OF THE 1ST WEEK OF LENT

MATEO 6:7-15. UNSA MAN ANG MAAYONG PAAGI SA PAG-AMPO? Si Hesus miingon, “Kon kamo mag-ampo, ayaw gamita ang daghang pulong sama sa gibuhat sa mga pagano nga nagtoo nga pinaagi sa daghang pulong sila pagadunggon.” Tukma kining pahimangno ning panahon sa Kwaresma kanus-a kita giawhag sa pagpalawom sa atong pag-ampo. Diha sa pag-ampo, dili ang gidaghanon sa mga pulong maoy importante kondili ang kamatinud-anon sa atong kasingkasing. Angay kitang mogahin og panahon sa pagpaminaw ug pagpamalandong sa mga Pulong sa Dios. Dili kinahanglan nga kita ang magsigi'g yawit kay, matod pa ni Hesus, ang Dios Amahan nasayod nang daan kon unsa ang atong gikinahanglan. Adunay nagsulat, “God is the best listener. You don’t have to shout or cry out loud because He hears even the silent prayer of a sincere heart.”

MONDAY OF THE 1ST WEEK OF LENT

MATEO 25:31-46. UNSA MAY MENSAHE SA SAMBINGAY SA “KATAPUSANG PAGHUKOM”? Ang sambingay naghatag og dakong hinungdan nganong angay natong higugmaon ang isigkaingon, ilabina ang mga kabos. Ang Hari nga naglingkod sa trono miingon: “Sultihan ko kamo nga bisan unsay inyong buhaton ning ubos kong mga igsoon, inyo kining gibuhat kanako”. Pinaagi niini kita gitudloan nga ang pagtabang sa isigkatawo makaayo dili lamang sa mga kabos kondili sa ato usab nga kalag. Sa pagtubag sa panginahanglan sa uban, atong maangkon ang kaluwasan. Busa, dili nato angay’ng baliwalaon ang mga kabos nga atong mahinagbo matag karon ug unya. Sa gawas sa usa ka Templo, adunay nasulat nga panultihon: “Extending one hand to help somebody has more value than joining two hands for prayer.”

SATURDAY AFTER ASH WEDNESDAY

LUKAS 5:27-32. KINSA MAN ANG MAS BULAHAN, ANG MAKASASALA BA O ANG MATARONG? Sa pag-ingon ni Kristo, “Gitawag ko ang mga makasasala, dili ang mga matarong”, wala niya ipasabot nga mas pinangga niya ang mga masalaypon kaysa mga buotan. Ang mga matarong gimahal pag-ayo sa Dios. Apan, gusto usab niyang luwason ang mga makasasala. Sila ang nanginahanglan og doktor ug sila ang hinungdan sa pag-anhi ni Kristo. Ang mga makasasala nga modawat sa ilang sayop ug mobiya sa daotang kinabuhi aron pagsunod kang Kristo maoy makaangkon og kaluwasan. Mao kini ang nahitabo kang Levi, Zakeo, Maria Magdalena, ug uban pa. Apan ang mga tawo nga nagtoo nga sila walay sala, sama sa mga Pariseo, mao na hinoon ang dili maluwas. Sakto ang panultihon, “A humble sinner is better than a self-righteous saint”.

FRIDAY AFTER ASH WEDNESDAY

MATEO 9:14-15. UNSA MAN KABILILHON ANG PAGPUASA? Ang pagpuasa usa ka dalaygong buhat, ilabina kon kini himoon uban sa maayong katuyoan ug dili pakitang-tao lamang. Ang pagpuasa mao ang pagdisiplina sa kaugalingon pinaagi sa pagpugong sa pagkaon, pag-inum, o paglingawlingaw. Mahimo kining makahuloganon kon ubanan sa mga buhat sa kalooy, sama sa pagpaambit og pagkaon sa gigutom, paghatag og kasilongan sa mga kabos, ug paglihok para sa hustisya ug kaangayan (Is 58:6-7). Diha sa ebanghelyo gipasabot ni Kristo nga adunay saktong panahon alang sa pagpuasa. Ug para kanatong mga Katoliko, ang Kwaresma maoy labing sakto nga kahigayonan sa paghimo niini. Makighiusa kita ni Kristo diha sa iyang paghigugma, pagpangalagad ug pagsakripisyo alang sa kinabuhi ug kahamugaway sa mga kabos ug sinalikway.

THURSDAY AFTER ASH WEDNESDAY

LUKAS 9:22-25. UNSA MAY ANGAY NATONG HATAGA’G BILI NING KINABUHI? Daghan kanato maninguha gayod nga makahupot og kwarta, nindot nga celfone, laptop, kotse, balay ug uban pa. Kasagaran, ang atong mga paningkamot magtumong sa pagpuno sa kaugalingon sa mga materyal nga butang. Apan, ang ebanghelyo nagpahinumdum kanato nga gihimo kita dili para sa kalibotan kondili para sa Gingharian sa Dios. “Aduna bay makuha ang tawo kon maiya ang tibuok kalibutan apan mawala ang iyang kinabuhi? Wala gayod!” I-asa man tuod nato ang kalibotanong bahandi kon kini makapahilayo kanato sa Ginoo? Ning kwaresma, disiplinahon nato ang atong kailibgon ug maninguha kita sa mga butang nga magdala kanato sa kaluwasan. Sakto ang pahimangno: “Never get so busy making a living that you forget to make a life.”