December 23, 2015 MISA DE GALLO

Lukas 1:57-66

UNSA MAY MENSAHE SA PAGKATAWO NI JUAN? Ang ebanghelyo nagsaysay sa pagpanganak ni Isabel, nga asawa ni Zacarias. Ginganlan nila ang bata og Juan, subay sa gisugo sa anghel. Ang pangalang Juan nagpasabot og “Ang Ginoo nagpakita’g dakong kaayo”. Si Juan maoy gasa sa Dios para sa iyang mga ginikanan; gasa usab siya para sa katawhan tungod kay siya mag-andam kanila sa pag-abot sa Mesiyas. Ang pagkatawo ni Juan magpahinumdum kanato sa kabililhon sa matag binuhat nga mahimugso ning kalibotan. Ang Ginoo maoy nagbuot sa atong pagkatawo. Dako kita’g bili tungod kay ang Dios maoy tag-iya kanato ug walay lain nga nahimugso o mahimugso pa nga sama kanato. Sama kang Juan, gipakatawo kita sa Dios alang sa usa ka katuyoan – ang pagpaila ni Kristo, nga mao ang gugma sa Dios para sa katawhan.

Ning kapaskohan:

1. Atong susihon kon giunsa nato paghatag og bili ang atong kinabuhi ug ang kinabuhi sa atong mga silingan. Giampingan, gipalambo, ug gitahod ba nato ang kaugalingon ug ang isigkaingon?
2. Ato usab nga pamalandongan kon unsa ang tuyo sa Dios sa pagbutang kanato ning kalibotan. Kon masabtan nato nga kita gihimo aron sa paghatag og himaya sa Dios, nan sugdan nato ang pagpasidungog Kaniya pinaagi sa atong mga maayong binuhatan.