MONDAY OF THE 3RD WEEK OF ADVENT (YEAR C)

MATEO 21:23-27. UNSA MAY KALAINAN SA TAWONG MATINUD-ANON UG SA MALANSISON? Kasagaran, ang tawong matinud-anon mosulti sa unsay anaa sa iyang hunahuna ug mobuhat sa iyang isulti. Wala siyay tuyo sa pagpangilad og mga tawo. Sama kang Hesus, mobarog siya sa kamatuoran bisan kon kini dili mauyonan sa mga dato ug gamhanan. Sa laing bahin, ang tawong malansison dili makanunayon. Karon, mosulti og usa ka butang, ugma lain na pud. Kasagaran, ang iyang mga pulong dili makita sa buhat, ug ang iyang binuhatan sukwahi sa iyang gipangtudlo. Sama sa mga kadagkaon sa templo ug sa mga Hudiyo, ang malansison walay kaisog nga mobarog sa kamatuoran ug magpauyon lamang sa unsay gusto sa katawhan. Si Warren Buffet nag-ingon: “Honesty is a very expensive gift. You cannot expect it from cheap people.”