MARCOS 2:1-12. UNSA MAY
MAKAPARALISA SA TAWO? Sa lawasnon nga aspeto, ang tawo mawad-ag kusog sa
paglihok kon siya mabali-ag bukog, mabunal ang ulo, masudla’g “deadly virus”, o
kaha, makasinati’g “stroke”. Apan ang paralisa dili lamang lawasnon kondili
espirituhanon usab. Ang tawo maparalisa sa espiritu kon kini napuno sa sala.
Ang daotang kinabuhi ug ang salang mortal maoy hinungdan nga ang tawo dili na motubo
ug molambo sa iyang emosyonal ug espirituhanong kinabuhi. Tungod sa sala, maguba
ang iyang relasyon sa Ginoo ug sa isigkatawo. Diha sa ebanghelyo, ang
paralisado nga tawo giingnan ni Hesus, “Ang imong mga sala gipasaylo na.
Bangon, dad-a ang imong gihigdaan ug lakaw.” Diha sa kumpisalan, ang pari
moingon sa nagbasol nga tawo, “Ang imong mga sala gipasaylo na, lakaw ug dad-a
ang kalinaw ni Kristo.”
No comments:
Post a Comment