MONDAY OF THE 10TH WEEK IN ORDINARY TIME (YEAR C)

MATEO 5:1-12. NGANONG BULAHAN MAN ANG TAWO NGA KABUS SA ESPIRITU, MAPAUBSANON, NAGTUMAN SA SUGO SA DIOS, MALULUY-ON, PUTLI OG KASINGKASING, NAGLIHOK ALANG SA KALINAW, GILUTOS UG GIBUTANGBUTANGAN? Ang maong tawo bulahan tungod kay siya nahiusa man kang Kristo. Ang “Beatitudes” o “Pagkabulahan” naghulagway sa pagkatawo ug kasinati-an ni Kristo. Sa iyang tibuok kinabuhi, gituman niya ang kabubut-on sa iyang Langitnong Amahan. Nagtrabaho siya alang sa katarong, kalinaw, hustisya ug kaangayan. Tungod niini, siya gipasipad-an, gibugalbugalan, gilutos ug gipatay. Ingon usab niini ang masinati sa mga magmatinud-anon sa pagsunod kang Kristo. Si Tim Keller nag-ingon: “Jesus Christ did not suffer so that you would not suffer. He suffered so that when you suffer, you’ll become more like Him.”

10TH SUNDAY IN ORDINARY TIME (YEAR C)

1 Kgs. 17:17-24; Gal 1:11-19; Lk. 7:11-17

Ambot lang kaha kon aduna pa bay mas sakit bati-on sa usa ka inahan kaysa mamatyan og anak. Mahinumdum pa ko kaayo sa mga pulong nga gisulti sa akong inahan samtang nagsud-ong siya sa akong igsoong babaye nga nagtinga tungod sa sakit nga kanser. “Kon mahimo pa lang anak, ako ang mopuli sa imong lugar. Ako na lang unta ang kuhaon sa Ginoo ug dili ikaw.” Para sa usa ka inahan, ang kamatayon sa usa ka anak maoy pinakalisod dawaton. Mas pili-on pa niya nga siya ang mamatay kaysa iyang anak.

Sa mga pagbasa karong Domingoha, duha ka inahan ang namatya’g anak nga lalaki: ang biyuda diha sa unang pagbasa ug ang biyuda diha sa ebanghelyo. Ang ilang pagkabiyuda maoy nakadugang sa ilang makalolooy nga kahimtang tungod kay sa ilang panahon ang babaye magsalig man lamang sa katungod ug panginabuhian  sa iyang bana. Ang ilang mga anak nga lalaki mao untay ilang paglaum ug kasaligan nga mabuhi, apan gikuha man hinoon sa Dios. Tungod sa kamatayon sa iyang anak, ang biyuda sa unang pagbasa nakapangutana kang propeta Elias: “Nasuko ka ba kanako, o tawo sa Dios? Mianhi ka ba aron pagpahinumdum sa akong mga sala?”

Sa mga panahon nga kita hadlaon og dagkong mga problema ug kasakitan, dili malikayan nga makapangutana usab kita sa Dios:  “Nasuko ka ba kanako Ginoo?” “Unsa may sala nga akong nabuhat nga gisilotan mo man ako og sama niini?” Karong Domingoha gitudloan kita nga ang mga problema ug kasakit sa tawo dili timailhan sa kasuko sa Dios. Dili usab kini angay nga sabton nga silot sa atong mga sala o panimalos sa Dios sa tawong makasasala. Diha sa unang pagbasa, gidungog sa Dios ang pag-ampo ni propeta Elias ug gibuhi niya ang anak sa biyuda. Ug diha sa ebanghelyo, si Hesus mismo ang nag-uli sa kinabuhi sa lalaki nga namatay ug naghatag niini balik ngadto sa iyang inahan. Nganong gibuhat man kini ni Hesus? Ang ebanghelyo nagsaysay nga si Hesus nibati og dakong kalooy sa biyudang inahan nga namatyan.

Kining mga pagbasa magpahimangno kanato sa dili pagtan-aw sa mga suliran ug kasakitan sa mga tawo isip silot gikan sa Dios. Imbis nga maghukom, kita gidasig nga mahisama kang Kristo nga mobati’g dakong kalooy sa mga nagmasulob-on ug nag-antos, makighiusa kanila, ug molihok alang sa ilang kaayohan. Gitawag kini sa Ingles og “Compassion”, kalooy nga ubanan og lihok sa pagpakighiusa ug pagtabang. Ang atong kalooy sa usa ka tawo (pity) walay kapuslanan kon kini dili ubanan og mga buhat sa gugma.

Ang kalibotan karon nanginahanglan og dugang nga “compassion”, dili lang “pity”, ug labaw nga dili “judgement”. Usa ka magsusulat nag-ingon, “A lighted candle of compassion can easily illuminate the world more than the blinding light of anger, intolerance and violence combined.” Hinaot nga kining mga pagbasa karon magdasig kanato nga mahisama sa Dios nga moduol ug mobisita sa mga tawo nga nagmasulob-on, makighiusa ug motabang kanila.

Ang Dalai Lama nag-ingon: “If you want others to be happy, practice compassion. If you want to be happy, practice compassion.”

Pamalandongan nato kini:

1. Kinsa man ang mga nag-antos ug gisakit sa atong palibot karon? Giunsa man nato pagtan-aw ug pagsabot ang ilang kahimtang?

2. Unsa may atong gibati ug gibuhat samtang nagtan-aw sa kalisdanan sa uban?

FEAST OF THE IMMACULATE HEART OF MARY (YEAR C)

LUKAS 2:41-51. NGANONG SAULOGON MAN ANG KAPISTAHAN SA PUTLI NGA KASINGKASING NI MARIA HUMAN SA PANGILIN SA BALAANG KASINGKASING NI HESUS? Ang kasingkasing sa usa ka inahan konektado sa kasingkasing sa iyang anak. Kon malipay ang anak, malipay usab kaayo ang inahan. Apan kon masakitan ang anak, dili usab matukib ang kasakit nga pagabati-on sa inahan. Mao kini ang kasinatian ni Maria. Sa iyang pagka-inahan sa Anak sa Dios, nahimo siyang kabahin sa tibuok kinabuhi ni Kristo, ilabina didto sa kalbaryo diin ang iyang anak gisakit ug gipatay sa krus. Maingon nato nga si Maria mao ang pinaka-unang disipulo ni Kristo. Siya ang labing unang sumusunod ni Kristo diha sa pagpangalagad ug pagsakripisyo para sa uban. Tungod niini, angay nga pasidunggan sa Simbahan ang Kasingkasing ni Maria uban sa Kasingkasing ni Hesus.

SOLEMNITY OF THE SACRED HEART OF JESUS (YEAR C)

LUKAS 15:3-7. UNSA MAY BILI SA TAWONG MAKASASALA? Sa tawhanong panan-aw, ang makasasala walay kwenta ug dili na angay’ng tagdon. Mao man gani nga moingon kita sa masalaypon: “Wala kay hinungdan!”, “Animal kang dako!” Usahay gani ato pa siyang tunglohon: “Mamatay pa unta ka!” “Ma-impyerno pa unta ka!” Apan sa mata sa Dios, ang makasasala magpabiling bililhon. Ang ebanghelyo nagpakasama sa Dios sa usa ka magbalantay sa karnero nga andam mobiya sa 99 ka buok aron pangitaon ang usa nga nawala. Tingali, sa pagkadungog nato ning ebanghelyo, moingon kita, “Way ayo!”. Kini tungod kay naghunahuna man kita nga ang makasasala mao ang laing tawo. Pero unsa kaha kon makaamgo kita nga kita diay ang makasasala nga gipangita sa Ginoo? Adunay nag-ingon, “If God did not forgive sinners, heaven would be empty.”

THURSDAY OF THE 9TH WEEK IN ORDINARY TIME (YEAR C)

MARCOS 12:28-34. UNSA MAY NINDOT NGA HALAD PARA SA GINOO? Ang ebanghelyo nagtudlo nga ang halad nga makalipay sa Dios dili ang kwarta o butang nga atong dalhon sa altar, kondili ang paghigugma Kaniya sa tibuok natong kasingkasing, hunahuna ug kusog, ug ang paghigugma sa isigkaingon sama sa paghigugma sa kaugalingon. Sa ato pa diay, ang atong kwarta o butang nga dalhon sa simbahan mahimo lamang nga bililhon kon sa inadlaw-adlaw natong kinabuhi aduna kitay panahon para sa Ginoo ug aduna kitay pagbati para sa isigkatawo. Nindot ang pahimangno ni Mother Teresa: “At the end of our lives, we will not be judged by how many diplomas we have received, or how much money we have made. We will be judged by ‘I was hungry and you gave me to eat, I was naked and you clothed me, I was homeless and you took me in.’”