Ez 17:22-24; 2 Cor 5:6-10; Mk 4:26-34
Unsa may atong ganahan – gagmay o
dagko? mubo o habog? Kasagarang tawo ganahan og dagko ug habog.
Tungod niini, mas mailhan sa kalibotan ang pinakadako nga barko, o
kaha ang pinakahabog nga edipisyo. Daghan usab mas mopili og dagko
nga trabaho tungod kay pinaagi niini mahinungan ta sa mga tawo.
Daghan pud mangandoy sa habog nga posisyon sa katilingban tungod kay
pinaagi niini kita hangdon sa kadaghanan.
Unsa may ganahan nato – hinay o
paspas? Kasagaran nato ganahan gyud og paspas. Pilion nato ang
sakyanan nga kusog modagan, ang trabaho nga dili madugay ang sweldo,
ang negosyo nga dali ra moginansya, o kaha ang wali nga dali ra
mahuman.
Ning Domingoha, gitudloan kita sa
ebanghelyo nga ang Gingharian sa Dios magsugod sa ginagmay'ng mga
butang ug makab-ot nato kini sa hinayhinay nga paagi. Pero yuna pa,
unsa man diay ang Gingharian sa Dios?
Diha sa ebanghelyo karon si Cristo
nagsaysay og duha ka sambingay: ang sambingay sa Liso nga Nagtubo ug
ang sambingay sa Liso sa Mustasa. Pinaagi ning duha ka mubong
sambingay atong masabtan nga ang Gingharian sa Dios wala magpasabot
og usa ka lugar o palasyo nga puy-an sa mga tawo. Ang Gingharian sa
Dios adunay kalabotan sa usa ka kahimtang o sitwasyon sa kinabuhi
diin ang kabubut-on sa Dios maoy maghari. Sa ebanghelyo ni San Lucas
giingnan ni Jesus ang mga tawo, “Dili dayag ang pag-abot sa
Gingharian sa Dios; dili ka makaingon 'Ania dinhi o tua didto,' kay
ang Gingharian sa Dios anaa na sa inyong taliwala” (17:21). Sa
pagsulti niini, iyang gipasabot ang iyang kaugalingon nga maoy
katumanan sa Gingharian sa Dios. Matag adlaw sa iyang pagpakig-uban
sa mga tawo, gituman niya ang kabubut-on sa iyang Amahan.
Ang kalambigitan sa Gingharian sa Dios
ug sa pagtuman sa Diosnong kabubut-on ato usab nga makita diha sa
pag-ampo nga gitudlo ni Jesus ngadto sa iyang mga tinun-an: “Amahan
namo nga anaa sa langit; pagdaygon ang imong ngalan. Moabut kanamo
ang imong gingharian, matuman ang imong pagbuot dinhi sa yuta maingon
sa langit” (Mateo 6:10). Ang Gingharian sa Dios mahitabo kon ang
kabubut-on sa Dios mao na ang gisunod sa mga tawo. Mahimo kining
realidad dili lamang sa langit kondili dinhi usab sa yuta.
Ang katukoran sa Gingharian sa Dios
magsugod sa ginagmay'ng mga butang – sama sa pagtuman sa sugo sa
ginikanan, pag-uli sa sobra nga sukli sa tindahan, pag-amping sa
butang nga hinolaman, pagtahod sa tigulang, o kaha sa pagtarong og
pagtoon diha sa tulonghaan. Kini sila murag gagmay'ng liso nga atong
gisugdan pagtanom sa atong kasingkasing ug kalag. Adunay kamatuoran
ang giingon ni Cristo: “Ang tawo nga masaligan sa gagmay'ng butang
masaligan usab sa dagko. Samtang ang tawo nga dili matinud-anon sa
gagmay'ng butang dili usab magmatinud-anon sa dagko” (Lukas 16:10).
Ang katumanan sa Gingharian sa Dios
mahitabo sa hinayhinay nga paagi. Walay tawo nga mahimong santos sa
usa lamang ka pagpamilok. Walay tawo nga mahimong matarong human lang
sa usa ka kagabhion. Sama sa gamay'ng liso sa mustasa nga atong
gitanom, ang atong pagtuman sa kabubut-on sa Dios hinayhinay nga
modako diha sa atong kasingkasing ug mamunga diha sa atong kinabuhi.
Mahitabo kini diha sa inadlaw-adlaw natong pagpaningkamot nga
mahimong sulondon nga mga anak sa Dios.
Si Manong Pablo usa ka inilang
negosyante og karne sa baboy diha sa merkado. Matag adlaw mahurot ang
lima ka dagkong inihaw nga baboy pagpalit sa mga tawo. Pinaagi niini,
gibuhi niya ang iyang pamilya, ug gipahuman niya og eskuyla ang lima
niya ka mga anak. Ako siyang gipanguta, “Unsa may sekreto nimo
manong sa maayo nga negosyo?” Ang iyang tubag ingon niini: “Padre,
sulod sa daghang katuigan, nagrespeto ug nagmatinud-anon ako sa akong
mga kustomer sa tindahan.” Nga sa ato pa, ang iyang inadlaw-adlaw
nga pagsunod sa kabubut-on sa Dios nagbunga og maayong kinabuhi para
kaniya ug sa iyang pamilya.
