Mateo
7:15-20. Kinsa man ang propeta? Ang propeta mao ang tawo nga magdala
og mensahe sa ngalan sa Ginoo. Tungod sa bunyag, matag usa kanato
nahimong propeta, adunay bokasyon sa pagtudlo o pagsangyaw sa mensahe
ni Cristo ngadto sa uban. Ang kaakohan sa pagkapropeta atong matuman
diha sa lain-laing kahimtang sa atong kinabuhi. Diha sa ebanghelyo si
Cristo naghisgot mahitungod sa mga mini nga propeta. Kinsa man kini
sila? Sila kadtong makamaong mosangyaw sa mensahe sa Dios apan wala
magpuyo niini. Sila ang mga tawo nga maayo lang manudlo o mamadlong,
apan ang kinabuhi hilabihan kasalawayon. Ang tinuod nga propeta mao
sila nga mouna pagpuyo sa mga mensahe nga ilang gipangtudlo.
