Saturday of the 11th Week in Ordinary Time (Year B)

Mateo 6:24-34. Unsa may angay natong kabalak-an? Ang responsableng ginikanan mabalaka para sa kaugmaon sa iyang mga anak. Ang buotang anak mabalaka usab alang sa kahimsog sa iyang ginikanan. Normal kini nga mga pagbati. Apan adunay mga kabalaka nga walay hinungdan. Pananglitan, adunay tawo nga magsigig kaguol nga matigulang ang porma o hitsura. Kini nga kabalaka walay kapuslanan tungod kay bisan unsaon dili man kapugngan ang pagkausab sa atong nawong ug ang katigulangon. Dili usab kini maoy labing importante. Diha sa ebanghelyo si Cristo nag-ingon nga ang Gingharian sa Dios ug ang katarong maoy angay natong unahon. Ang pagkab-ot niini mao unta ang sentro sa atong mga paningkamot.