Friday of the 11th Week in Ordinary Time (Year B)

Mateo 6:19-23. Unsa may atong gipakabahandi sa kinabuhi? Ang tawo dali ra madani sa bahanding kalibotanon sama sa kwarta, balay, yuta, ug alahas. Dili man sayop ang paghupot og mga butang nga sama niini kon kini atong kab-oton sa maayong paagi, huptan sa igo nga gidaghanon, ug gamiton sa saktong tumong. Ang ubang tawo mahungog sa materyal nga mga butang ug tungod niini mahimo silang tikasan, kawatan ug laog. Dili kini angay mahitabo kanato. Iasa man nato ang sobrang materyal nga bahandi nga dili man nato kini madala sa kamatayon? Mas maayo pa nga atong sundon ang sugo ni Cristo sa pagtigum og bahanding langitnon  sama sa kaayo ug kamanggihatagon kay kini dili madugta ug dili mawala.