Mateo
5:20-26. Sensitibo ba kita sa pagbati sa ubang tawo? Daghan kanato
dali makabantay sa kaugalingong pagbati, apan dili sa pagbati sa
laing tawo. Dali kita masuko kon kita ang binuangan, apan sayon lang
nato ang pagbinuang sa uban. Gahi kita malimot sa sayop nga nahimo sa
tawo kanato, apan dali nato malimtan ang atong nahimong sayop sa
uban. Dili kini maayo. Sa ebanghelyo si Jesus miingon: “Inigdala
nimo sa imong halad sa Dios... ug didto mahinumdum ka nga nasilo ang
imong isigkatawo, biyai ang imong halad atubangan sa halaran, ug
pakig-uli una kaniya. Unya balik sa halaran ug ihalad ang imong halad
sa Dios.” Kini ang pamaagi ni Jesus sa paghimo kanato nga mas
sensitibo sa pagbati sa uban.
