Gitahod
namo ang Dios. Girespeto namo ang kinabuhi sa tawo. Gihatagan namo
og bili ang pamilya. Gihigugma namo ang mga kabataan. Kini ang mga
hinungdan ngano nga kami, ang Katawhan sa Dios sa Dyosesis sa
Talibon, makusganon nga mobabag sa gipasakang balaodnon nga gitawag
og Reproductive Health Bill.
Nagatoo
kami nga ang RH Bill wala mahisubay sa kabubut-on sa Ginoo. Ang
sakramento sa kaminyoon, nga gimugna sa Dios, adunay duha ka katuyoan
nga dili mahimong bulagon. Una, kini para sa kahiusahan ug kalipay sa
magtiayon nga magkahigugmaay. Ug ikaduha, kini alang sa pagpasanay ug
kaayohan sa tawhanong kaliwatan. Tungod niini, ang magtiayon
kinahanglan nga magpabiling abli sa posibilidad nga ang ilang gugma
mamunga og bag-ong kinabuhi. Kining duha ka bililhong tumong
gibalewala sa RH Bill sa dihang gidasig niini ang artificial
contraception, usa ka buhat nga maghawid sa magtiayon sa paghatag sa
kinatibuk-ang kinabuhi ngadto sa usag-usa ug magtumong sa pagsira sa
posibilidad nga adunay bag-ong kinabuhi nga mahimugso diha sa ilang
panagpuyo.
Nagatoo
kami nga ang RH Bill walay pagtahod sa kinabuhi sa tawo. Ang tawo
sagrado kaayo tungod kay siya gimugna sa hulagway ug kasamahan sa
Dios. Angay lamang nga atong panalipdan ug ampingan ang tawo gikan sa
iyang pagkahimugso hangtod sa iyang kamatayon. Ginaingon nga ang RH
Bill para sa kahimsog sa tawo. Apan, sa iyang pagdasig sa artificial
contraception, nahimo kining peligroso dili lamang sa panglawas,
kondili sa kinabuhi mismo sa bata diha sa sabakan. Makadaot usab kini
sa lawasnon ug espiritohanong kinabuhi sa mga babae ug sa mga lalaki
nga mosunod niini.
Nagatoo
kami nga ang RH Bill dili matinud-anon sa pag-amping sa pamilya. Ang
pamilya gitawag og “Gamay'ng Simbahan” tungod kay dinhi itudlo ug
sugdan sa pagpuyo ang gugma para sa Dios ug sa isigkatawo. Sa
pagdasig sa artificial contraception, ang RH Bill nagbutang sa
pamilya sa usa ka delikadong kahimtang. Napamatud-an na sa mga
nagtoon nga ang mga nasod nga nagduso sa artificial contraception
nakasinati og dakong pagtubo sa mga kaso sa pagpanapaw, diborsyo,
pakighilawas gawas sa kaminyoon, pagmabdos sa mga batan-on, ug
aborsyon.
Nagatoo
kami nga ang RH Bill walay saktong gugma sa kabataan. Ang mga bata
gasa sa Dios. Ato silang gipakabililhon tungod kay sila ang maghatag
og kahulogan sa atong Kristohanong kinabuhi ug magdasig sa mga
ginikanan sa pagpaningkamot sa pagtrabaho. Ang RH Bill nagtan-aw sa
kabataan nga babag sa kalamboan. Gihunahuna niini nga ang Pilipinas
mas moasenso kon mogamay ang gidaghanon sa mga batang buhion,
pakan-on ug paeskuylahon. Wala niini tan-awa ang kamatuoran nga ang
kabataan magdala og kaugmaon ug kaayohan.
Imbis
nga suportahan ang RH Bill, kami mapaubsanon nga manawagan sa tanang
Pilipino ug sa mga magbabalaod sa nasod sa:
- Pagdasig ug paggamit sa Natural Family Planning (NFP) diha sa pagplano sa gidak-on sa pamilya. Ang NFP kabahin sa maalamon nga desinyo sa Ginoo para sa tawhanong sekswalidad. Dili kini paliton, epektibo kaayo, ug walay mga daotang epekto sa lawas. Labaw pa niana, magdasig kini og pagrespetohay, pagtinabangay, pagdisiplina ug pagpugong sa kaugalingon - mga hiyas nga bililhon alang sa malungtaron ug malipayong kaminyoon.
- Pag-ila ug paglaban sa katungod sa bata nga anaa sa sabakan. Ang bata sulod sa tagoangkan maoy labing luoy sa mga anak sa Dios. Kinahanglan natong panalipdan ang iyang kinabuhi ug siguradohon ang iyang kaayohan pinaagi sa pagdili sa abortifacient contraceptives ug sa tinuoray nga pagpatuman sa balaod batok sa aborsyon.
- Paggamit sa pundo sa gobyerno alang sa pagpakigbatok sa kapobrehon, dili sa pagpamalit og contraception. Ang dakong bahin sa panudlanan sa nasod nagagikan sa hinagoang kwarta sa mga tawo, nga kadaghanan mga Katoliko. Angay lamang nga kini gamiton alang sa mga proyekto nga maghatag og kinabuhi sa katawhan, dili sa mga butang nga ikasakit ug makadaot kanila.
- Pagpadayon sa malisod nga pakigbugno batok sa korupsyon, nga maoy labing dakong hinungdan sa kalisod ug kasakit sa katawhan. Ipabilanggo ang mga kawatan ug ipauli nila ang kinawat nga bahandi sa nasod.
Busa, makighiusa
kami sa tinuod nga tingog sa katawhang Pilipinhon diha sa pag-ingon,
“No to RH Bill, Yes to God's Will!”
