Mateo
6:7-15. Unsa man ang saktong pamaagi sa pag-ampo? Ang kanindot sa
pag-ampo dili masukod sa gidaghanon sa mga pulong o sa katas-on sa
litaniya. Kinahanglan aduna gayod kitay panahon para sa paghilom ug
pagpamalandong sa Pulong sa Ginoo. Sa pag-ampo, mosangpit kita sa
Dios sama sa usa ka anak nga mamarayeg sa iyang mapinanggaong amahan.
Dayegon ug pasalamatan nato ang Ginoo sa Iyang makanunayong
pag-amping kanato. Dili kita mangayo Kaniya sa bisan unsa na lang.
Igo na nga hatagan kita Niya sa inadlaw-adlaw natong gikinahanglan
aron mabuhi nga malipayon. Uban niini, pangayoon nato ang grasya nga
makapasaylo kita sa isigkatawo ug malikay sa daotang binuhatan.
