Mateo
5:13-16. Unsa may papel sa mga Kristiyano dinhi sa kalibotan? Diha sa
ebanghelyo, si Jesus migamit og duha ka hulagway: asin ug kahayag.
Ang asin maghatag og kalami sa pagkaon. Sa samang paagi, ang mga
Kristiyano gilaoman ni Jesus nga maghimo sa kalibotan nga mas nindot
nga puy-an. Ang kahayag importante nga elemento sa kalibotan; kon
wala kini magbinanggaay kita ug daghan kanato ang mahagbong sa mga
kanal o pangpang. Gitawag kita ni Jesus og “kahayag” tungod kay
gusto niya nga kita ang maghatag og lamdag sa katilingban ug nga kita
ang maggiya sa usag-usa sa saktong dalan padulong sa katarong. Bisan
unsa ang estado sa kinabuhi, mahimo nato ang paghatag og gugma ug
kalipay sa katilingban.
