Thursday, June 7, 2012

Thursday of the 9th Week in Ordinary Time (Year B)

Marcos 12:28-34. Unsa man ang labing nindot nga halad para sa Ginoo? Ang ebanghelyo karon nagtudlo kanato nga ang halad nga labing makalipay sa Dios dili kwarta, butang, o pagkaon nga atong dalhon sa altar, kondili ang paghigugma Kaniya sa tibuok natong kasingkasing, hunahuna ug kusog, ug ang paghigugma sa isigkaingon sama sa atong paghigugma sa kaugalingon. Sa ato pa diay, ang atong kwarta o butang nga dalhon sa simbahan walay bili kon sa inadlaw-adlaw natong kinabuhi wala kitay panahon para sa Ginoo ug wala usab kitay pagbati para sa isigkatawo. Tabla ra kita sa usa ka ginikanan nga magsigi lag hatag og kwarta ug butang sa anak apan walay panahon ug pag-atiman niini.