16TH SUNDAY IN ORDINARY TIME (YEAR C)

LUKAS 10:38-42

Isip pari, malipayon ako nga magsaulog sa Santos nga Misa sa mga kabaryohan. Kasagaran sa mga tawo sa baryo maabi-abihon kaayo. Ordinaryo lamang ang ilang pamuyo apan dato sila’g kasingkasing. Sa kanunay, mag-andam gayod sila og lami-an nga pagkaon para sa pari ug mga kauban. Apan, aduna akoy nabantayan nga problema.  Sa akong pagbalikbalik sa kabaryohan, akong nahinungan nga kasagarang mag-andam sa pagkaon sa pari dili na makasimba. Ug kini tungod kay magpahiluna man sila sa pagkaon sa pari. Ang maong paagi akong gihangyo nga usbon tungod kay para kanako dili angay nga ang pag-andam sa pagkaon sa pari maoy makababag sa pagsimba sa pipila ka maalagarong mga tawo. Wala may problema kon ordinaryo lang ang pagkaon sa pari. Wala may kaso kon bugnaw ang pagkaon sa pari. Mas mahinungdanon nga ang tanan makapaminaw sa pulong sa Diyos ug makadawat ni Kristo diha sa Santos nga Misa.

Diha sa ebanghelyo karong Domingoha, atong nadungog ang estorya mahitungod sa duha ka igsoong babaye nga ginganla’g Marta ug Maria, nga miabi-abi kang Hesus diha sa ilang panimalay. Si Marta nagkapuliki og andam para kang Hesus ug sa iyang mga kauban, apan si Maria naglingkod lamang sa tiilan sa Ginoo ug namati sa iyang mensahe. Mireklamo si Marta mahitungod sa iyang igsoon ngadto kang Hesus, apan siya ang gipahimangnoan sa Ginoo, “Ay, kanimo, Marta! Naguol ug nahingawa ka sa daghang mga butang, nga unta usa ra man ang gikinahanglan. Nakapili si Maria sa labing maayo, ug walay makakuha niini gikan kaniya.”

Ang pag-asikaso ni Marta para kang Hesus dili daotan, sama nga ang pag-andam og pagkaon alang sa pari dili usab daotan. Ang pagkamatinagdanon sa bisita usa ka hiyas nga dalaygon ug angay natong buhaton. Apan sa pagbuhat niini, dili nato kalimtan ang pagpaminaw sa pagtulon-an sa Ginoo. Ang gisulti ni Hesus kang Marta dili nato angay’ng sabton nga pagsaway sa usa ka mangil-ad nga lihok, kondili pagpahiluna sa usa ka maayong buhat. Ang Ginoo nagpasabot kang Marta nga bisan tuod ikalipay niya ang iyang giandam sa kusina, mas malipay siya kon kini maghatag og panahon sa pagpakighinabi kaniya ug pagpaminaw sa iyang mensahe.

Dili nato ikalilong nga sa inadlaw-adlaw natong pagtrabaho ug pagpangitag panginabuhi-an, usahay malimtan nato ang Ginoo. Sa kadaghan sa atong giatiman nga trabaho, usahay wala na tay panahon sa pag-ampo. Kon mag-ampo man gani, dinalian ug kadiyot ra pud. Wala na tay panahon sa pagpamalandong ug pagpaminaw sa Ginoo. Kini ang nahitabo kang Marta ug kini ang kahimtang sa atong kinabuhi nga buot ipausab sa ebanghelyo. Ang ebanghelyo magdasig kanato sa paghatag og unang pagtagad sa pag-ampo ug pagpaminaw sa mensahe sa Dios. Unahon ang pagpaminaw sa mga Pulong sa Dios tungod kay kini maoy maghatag sa tawo og lamdag sa iyang kinabuhi ug giya sa iyang mga buhaton. Ang tawo nga malamdagan sa Pulong sa Dios dili mahisalaag ug dili gayod makabuhat og daotan.

Pamalandongan nato kini:

1. Unsa man ang mga butang nga makabalisa pag-ayo kanato ug makapalayo kanato sa Ginoo?

2. Unsa may angay natong buhaton aron makapamati kanunay sa mga mensahe sa Dios ug makatuman niini sa matag adlaw?

FEAST OF OUR LADY OF MOUNT CARMEL

MATEO 12:14-21. UNSA MAY ATONG BUHATON ARON MADAWAT ANG GRASYA NGA MAG-UBAN SA PAGSUL-OB SA ESKAPULARYO SA BIRHEN SA CARMEN? Sa paghatag sa eskapularyo ngadto kang San Simon Stock, ang Mahal nga Birhen sa Carmen nanaad nga ang mga sumusunod nga mamatay nga magsul-ob sa eskapularyo dili gayod makasinati sa kalayo sa impyerno. “Ang eskapularyo maoy timaan sa kaluwasan, panalipod batok sa katalagman ug pasalig sa kalinaw.” Matod sa tradisyon sa Simbahan, adunay tulo ka butang nga atong buhaton aron matagamtam ang mga panaad sa Mahal nga Inahan: 1) atong isul-ob ang sagrado nga escapularyo, 2) atong paningkamotan ang pagpuyo sa kinabuhi nga putli, o kinabuhi sa pagkasumusunod ni Kristo, ug 3) Atong kanunayon ang pag-ampo sa Santos nga Rosaryo.

FRIDAY OF THE 15TH WEEK IN ORDINARY TIME (YEAR C)

MATEO 12:1-8. UNSA MAY MAS BILILHON, ANG PAGDALA OG HALAD DIHA SA TEMPLO O ANG KALOOY PARA SA ISIGKATAWO? Ang mga Pariseo nailhan sa ilang pagkamatinumanon sa balaod ni Moises. Nag-una sila sa pagrespeto sa Adlaw'ng Igpapahulay ug sa pagdala’g halad nga mananap didto sa templo. Apan nganong gisaway man sila ni Hesus? Kini tungod kay ang ilang pagtuman sa balaod wala makahimo nilang maloloy-on; nahimo hinoon silang mahukmanon sa isigkaingon. Gipahimangnoan sila ni Hesus pinaagi sa pagkutlo sa Kasulatan: “Dili ako gusto'g mga halad nga mananap, kondili kalooy.” Pinaagi ning ebanghelyo, kita gitudloan sa kabililhon sa kalooy nga atong ipakita sa isigkatawo. Kon kita madasigong magdala’g halad ngadto sa altar sa Dios, labi pa unta kitang madasigong magdala’g tabang ngadto sa mga nanginahanglan.

THURSDAY OF THE 15TH WEEK IN ORDINARY TIME (YEAR C)

MATEO 11:28-30. UNSA MAY MAKAPAGAAN SA YUGO NGA IPAPAS-AN NI KRISTO KANATO? Ang yugo ni Kristo sayon ug gaan tungod kay ang nagsugo kanato sa pagpas-an niini malumo man og kasingkasing; dili mapahitas-on ug dili masuk-anon. Ang Dios makasabot sa atong katakos; makamao siyang magpasensya kon kita maglisod; ug andam siya nga motabang kanato sa pagdala sa yugo kon kita mosangpit kaniya. Dugang pa niana, ang yugo ni Kristo sayon ug gaan tungod kay kini ipapas-an man uban sa gugma. Paalagaron kita nga mahigugmaon; pasimbahon kita sa kinasingkasing; ug patabangon kita nga dili mag-apas og bayad. Ang trabaho ug kasugoan nga tumanon uban sa gugma mahimo nga sayon ug gaan. Matod pa ni Katherine Graham, “To love what you do and feel that it matters – how could anything be more fun.”

WEDNESDAY OF THE 15TH WEEK IN ORDINARY TIME (YEAR C)

MATEO 11:25-27. UNSA MAY ATONG BUHATON ARON MASABTAN ANG KABUBUT-ON SA DIOS? Si Hesus nagpasalamat sa iyang Amahan tungod sa Iyang pagpadayag sa kaugalingon ngadto sa mga gagmay'ng bata. Ang “gagmay'ng bata” wala magpasabot og mga bag-ong nahimugso kondili mga tawo nga mapaubsanon, o sila nga andam maminaw sa Pulong sa Dios. Ang mga maalamon dili daotan sa mata ni Hesus, apan iyang gisaway kadtong mga tawo nga nahimong mapahitas-on tungod sa gihuptan nga kahibalo, sama sa mga Pariseo. Tungod sa hunahuna nga sila puno sa kaalam, dili na nila dawaton ang gipangtudlo ni Kristo. Hinaot nga dili kita mahisama kanila. Ang bantogang pilosopo nga si Socrates nagpahinumdum: “True wisdom comes to each of us when we realize how little we understand about life, ourselves and the world around us.”

TUESDAY OF THE 15TH WEEK IN ORDINARY TIME (YEAR C)

MATEO 11:20-24. GIHATAGAN BA NATO’G BILI ANG MGA LIHOK SA GINOO DIHA SA ATONG KINABUHI? Gikasab-an ni Hesus ang katawhan sa Corasin, Betsaida ug Capernaum tungod sa ilang paghatag og gamay’ng bili sa mga milagro nga iyang gihimo. Nagpadayon sila sa pagkadaotan ug wala magpakitag interes nga mobalik sa Dios. Tungod niini, giingnan sila ni Hesus nga mas malooy pa ang Dios sa katawhan sa Tiro, Sidon ug Sodoma kaysa kanila. Matag karon ug unya, adunay mga milagro nga mahitabo sa atong kinabuhi – bata nga mahimugso, trabaho nga madawat, sakit nga maayo, relasyon nga mauli, gugma nga bati-on, ug uban pa. Si Albert Einstein nag-ingon: “There are only two ways to live your life. You can live as if nothing is a miracle or you can live as if everything is a miracle.” Hinaot nga ang ikaduha maoy atong pili-on.