FEAST OF ST. MARY MAGDALENE

JUAN 20:1-2, 11-18. UNSA MAY NINDOT NGA MENSAHE SA KAPISTAHAN NI SANTA MARIA MAGDALENA? Sa ebanghelyo ni San Juan, si Maria Magdalena lamang ang babaye nga niadto sa lubnganan sayo sa buntag sa unang adlaw sa semana (Kang San Mateo duha sila, kang San Marcos tulo, ug kang San Lukas pipila sila kabuok). Ang mga babaye maoy unang nahibalo sa Pagkabanhaw sa Ginoo; sila ang unang gipadala aron pagsangyaw sa maayong balita. Adunay tradisyon sa simbahan nga nagtawag kang Maria Magdalena nga “Apostola Apostolorum” (Apostoles sa mga Apostoles) tungod kay siya man ang gipadala aron pagpahibalo sa mga apostoles nga nabanhaw ang Ginoo. Kining kamatuoran angay’ng maghagit sa Simbahan sa pag-ila sa dakong papel sa mga babaye diha sa buhat sa pagsangyaw, pagbalaan ug pagpangulo sa katawhan.

THURSDAY OF THE 16TH WEEK IN ORDINARY TIME (YEAR C)

MATEO 13:10-17. UNSA MAN ANG MGA SAMBINGAY? Sama sa daghang mga magtutudlo sa iyang panahon, si Hesus nigamit og mga mugbong sugilanon nga maghatag og mahinungdanong pagtulon-an para sa tawo. Tungod kay nagsumikad kini sa ordinaryong panghitabo sa kinaiyahan ug katilingban, dali ra kining masabtan. Gitawag kini sila’g “sambingay”, sa Ingles “parable”, nga nagagikan sa Griegong pulong “paraballein” nga nagpasabot og pagtandi. Kon ang mga sambingay dali rang masabtan, nganong wala man masabti sa mga Pariseo ug mga magtutudlo sa Balaod ang mensahe ni Kristo? Kini tungod sa ilang garbo ug kagahi’g ulo, nga maoy nakadaot sa ilang maayong panabot. Nindot ang giingon ni Malcolm Muggeridge: “Every happening, great and small, is a parable whereby God speaks to us. And the art of life is to get the message.”

WEDNESDAY OF THE 16TH WEEK IN ORDINARY TIME (YEAR C)

MATEO 13:1-9. KINSA MAN ANG TAWO NGA MAKAHIMO’G MGA MAAYONG BUHAT? Diha sa sambingay sa Tigpugas, atong masabtan nga ang liso - nga mao ang Pulong sa Dios - mabuhi, motubo, ug mamunga’g daghan kon kini mahagbong sa maayong yuta. Unsa man kining maayong yuta? Ang maayong yuta mao ang kasingkasing sa tawo nga andam ug mahinangpon kanunay nga modawat sa Pulong sa Dios isip pagkaon sa iyang kalag. Matag adlaw, ang maong tawo mangita’g kahigayonan nga mohilom ug mag-ampo, mobasa sa Pulong sa Dios ug mamalandong niini. Si San Agustin nag-ingon: “We speak to God when we pray. God speaks to us when we read the Bible.” Ang Pulong sa Dios adunay talagsaong gahom; ang tawo nga maminaw niini sa matag adlaw mamunga gayod og daghang maayong buhat.

TUESDAY OF THE 16TH WEEK IN ORDINARY TIME (YEAR C)

MATEO 12:46-50. UNSA MAY MAKAPAHIMO NATONG SAKOP SA PAMILYA NI HESUS? Ang Katesismo nagtudlo nga pinaagi sa bunyag naluwas kita sa sala ug nahimugso pagbalik isip mga anak sa Dios, nahimo kitang mga sakop ni Kristo ug nahiusa sa Simbahan. Ang pagka-anak sa Dios ug ang pagka-igsoon ni Kristo usa diay ka gasa nga atong nadawat diha sa sakramento. Apan, angay usab nato hatagag pagtagad ang gisulti ni Hesus diha sa ebanghelyo: “Kinsa man ang akong inahan? Kinsa man ang akong mga igsoon? Si bisan kinsa nga magbuhat sa kabubut-on sa akong langitnong Amahan akong mga igsoon ug inahan.” Nga sa ato pa, ang atong pagkasakop sa pamilya sa Dios angay gayod natong puy-an. Si Pope Francis nag-ingon: “We could say that there is only one real kind of poverty: not living as children of God and brothers and sisters of Christ.”

MONDAY OF THE 16TH WEEK IN ORDINARY TIME (YEAR C)

MATEO 12:38-42. KINAHANGLAN BANG ADUNAY MAHITABONG MILAGRO ARON KITA MAG-USAB SA ATONG KINABUHI? Kon adunay makita o masinati nga milagro, daghan ang mokalit la’g kabuotan, makamao nang mag-ampo, moangkon na’g sala, mawala ang ngil-ad nga batasan, ug mahimong manggihatagon. Apan ingon ba niini ang kabubut-on sa Dios? Sa ebanghelyo, wala patughi ni Hesus ang pagpangayo sa mga tawo og milagro. Nasayod siya nga dili kini ang timaan sa tinuod nga pagtoo ug gugma. Mas nindot kon higugmaon nato ang Dios dili tungod sa milagro kondili tungod kay Siya man ang atong mahigugmaong Amahan. Mas makahuloganon usab nga magbinuotan kita dili tungod sa milagro kondili tungod kay kini man ang makaayo kanato. Si Albert Einstein nag-ingon: “Don’t wait for miracles. Your whole life is a miracle.”