FRIDAY OF THE 5TH WEEK IN ORDINARY TIME

MARK 7:31-37. GIHATAGAN BA NATOG BILI ANG ATONG KAPASIDAD SA PAGPAMINAW UG PAGSULTI? Ang ebanghelyo nagsaysay sa gihimong pag-ayo ni Hesus sa usa ka tawong bungol ug amang. Kadaghanan nato walay problema sa pagkabungol ug pagka-amang. Ang atong problema anaa sa kawalay panahon o gana sa pagpaminaw ug pagpakighinabi sa usag-usa. Tungod sa trabaho, wala na tay panahon nga maminaw sa pulong sa Dios. Tungod sa mga electronic gadgets, dili na ta magtinagdanay diha sa panimalay. Tungod sa facebook, ang mga kabataan dili na maminaw ug makighinabi sa ilang mga ginikanan ug apohan. Malipay kaha ang Dios niini? Dili gayod. Sundon nato ang tambag: "Speak in such a way that others love to listen to you. Listen in such a way that others love to speak to you."

THURSDAY OF THE 5TH WEEK IN ORDINARY TIME

MARCOS 7:24-30. NGANONG KINAHANGLAN MAN NATONG RESPETOHAN ANG MGA TAWO NGA LAHI KANATO OG PAGTOO? Para sa mga Hudiyo, ang mga pagano o mga tawo nga lahi kanila og pagtoo sama ra og bili sa iro. Kining maong panghunahuna gipamulong ni Kristo ngadto sa babaye nga pagano nga mihangyo kaniya alang sa kaayohan sa iyang anak nga masakiton. “Dili maayo nga kuhaon ang pagkaon sa mga anak ug ipakaon sa mga iro.” Gisulti kini ni Hesus dili aron pag-insulto sa maong babaye kondili aron pagsukod sa iyang pagtoo. Ug sa dihang napamatud-an ni Hesus ang kahugot sa pagtoo sa babaye, iyang gihatag ang iyang gipangayo. Kining ebanghelyo magtudlo kanato sa pagtahud sa matag tawo, bisan unsa man ang iyang pagtoo nga gihuptan. Matod pa, “We don’t have to agree on anything to be kind to one another.”

WEDNESDAY OF THE 5TH WEEK IN ORDINARY TIME

MARCOS 7:14-23. UNSA MAN ANG MAGHATAG OG TINUOD NGA KAANYAG SA TAWO? Daghan kanato mogahin og daghang panahon ug kwarta aron ipabiling batan-on ug maanyag ang lawas ug panagway. Apan, pipila lang kanato ang interesado nga ipabilin ang kanindot ug kaanyag sa kasingkasing. I-asa man ang kambong o kaanyag sa imong nawong, kon ang imong kasingkasing maot ug daotan? Ganahan ba ang mga tawo nimo kon ikaw ambongan apan hambugero ug mapahitas-on? Malipay ba ang Dios nimo kon ikaw gwapa apan tsismosa ug libakira? Dili gayod. Ang ebanghelyo karon nagtudlo kanato nga ang anaa sa sulod sa tawo, ang iyang kasingkasing, maoy labing importante. Adunay panultihon nga nag-ingon: “Beauty aren’t as beautiful as they look, as they walk or as they talk. They are only as beautiful as they love, as they care and as they share.”

TUESDAY OF THE 5TH WEEK IN ORDINARY TIME

MARCOS 7:1-13. UNSA MAY MAHITABO KON ANG ATONG PAG-AMPO UG BUHAT DILI KINASINGKASING? Ang mga pulong sa pag-ampo, ug bisan ang mga maayong buhat, mawad-ag bili kon kini dili ubanan og maayong kasingkasing. Gisaway ni Hesus ang mga Pariseo ug mga magtutudlo sa Balaod pinaagi sa pag-ingon: “Kining mga tawhana nagpasidungog kanako sa pulong lamang, apan ang ilang kasingkasing halayo kanako.” Kining ebanghelyo maghagit kanato sa pagsusi sa atong mga pag-ampo ug mga apostolado. Gibuhat ba nato kini aron sa pagdayeg sa Ginoo o aron lamang ipakita sa mga tawo. Adunay panultihon nga nagkanayon, “Sincerity makes the very least person to be of more value than the most talented hypocrite.” Ang kamatinud-anon sa tawo, dili ang kanindot sa iyang pulong ug buhat, maoy mas mahinungdanon.

SATURDAY OF THE 4TH WEEK IN ORDINARY TIME

MARCOS 6:30-34. NGANONG IMPORTANTE MAN ANG PAGPAHULAY DIHA SA KAHILOM? Human sa malampuson nga pagsangyaw, ang mga apostoles giingnan ni Hesus: “Mangadto kita sa dapit nga awaaw aron makapahulay kamo’g diyotay.” Isip lawasnon, kinahanglan natong hatagag panahon nga makapahulay ang atong lawas aron maandam sa sunod nga mga buluhaton. Kon dili kita mohunong sa pagtrabaho, dako ang purohan nga masakit kita ug maluya. Isip espirituhanon, angay usab natong papahulayon ang atong utok ug kasingkasing aron kini mahiluna diha sa Dios. Diha sa kahilom ug sa pag-ampo, atong masinati ang kalinaw ug masabtan ang kabubut-on sa Ginoo para kanato. Kini ang pahimangno ni Mother Teresa: “God speaks in the silence of our heart. Listening is the beginning of prayer.”

WEDNESDAY OF THE 4TH WEEK IN ORDINARY TIME

MARCOS 6:1-6. UNSA MAN ANG ESTADO SA MGA KABOS DIHA SA KATILINGBAN SA DIOS? Tungod sa pagka-ordinaryo sa iyang pamilya ug tungod kay siya usa lamang ka karpentero, si Hesus wala tuohi sa Iyang tagilungsod. Kining sayop nga batasan anaa gihapon sa atong katilingban karon. Daghan kanato adunay pagpihig sa mga inila, dato ug edukado, apan walay pagsalig sa mga ordinaryong tawo, kabos, ug walay grado. Apan, sa mga mata sa Ginoo, ang tawo dili pagahukman pinaagi sa iyang dungog, bahandi, o edukasyon, kondili pinaagi sa iyang kasingkasing (1 Samuel 16:7). Ang pagkadato ug pagkapobre dili kwentahon sa porma ug kwarta kondili sa kaayo ug gugma. Adunay usa ka Scottish Proverb nga nagkanayon: “Do not judge by appearances; a rich heart may be under a poor coat.”