11TH SUNDAY IN ORDINARY TIME (YEAR C)

2 Sam 12:7-10,13; Gal 2:16, 19-21; Lk 7:36-8:3

Sukad sa pagkabata, daghan na kitag nahimong mga sayop ug sala, kasagaran niini dili seryoso. Apan, dili ikalilong nga nakahimo usab kitag dagkong kasal-anan. Dihay mga higayon nga nakonsensya kita ug nakahukom nga mangayog pasaylo ngadto sa tawo nga atong napasakitan ug ngadto sa Ginoo pinaagi sa pagkumpisal. Human kini nato buhata, ug sa dihang nadawat nato ang kapasayloan, gibati kitag dakong kalipay ug kalinaw diha sa atong kasingkasing. Ingon niini ang gasa sa pagpasaylo nga atong madawat gikan sa isigkatawo ug labi na gayod sa Ginoo.

Ang mga pagbasa ning Domingoha nagpaila sa tulo ka dagkong makasasala nga gipasaylo sa Ginoo. Ang una mao si David, nga nangilog sa asawa sa iyang sundalo nga si Uria. Wala lang niya himoang kabit si Batseba; iya pa gayod nga gipapatay si Uria didto sa panggubatan. Dili basta-basta kining maong sala, apan gipasaylo sa Dios si David human kini magbasol ug mangayog pasaylo. Ang ikaduha mao si Pablo, nga maoy naglutos sa unang mga sumusunod ni Kristo. Dili lang usa kondili daghang kinabuhi ang nakalas tungod sa pagpanglutos ni Pablo. Apan, ang Dios nilihok aron pagluwas kaniya. Matod pa ni Pablo, “Kining kinabuhi ko karon akong nadawat diha sa pagtuo ko sa Anak sa Dios nga nahigugma kanako ug nagpakamatay alang kanako.” Ug ang ikatulo mao ang babaye nga salawayon og binuhatan (gitoohan nga nagbaligya sa iyang lawas). Gipakita niya ang iyang pagbasol pinaagi sa mga mahigugmaong lihok: gihugasan niya ang mga tiil ni Hesus pinaagi sa iyang mga luha, gitrapohan niya kini sa iyang mga buhok, gibubo-an kinig mahalon nga pahumot ug gihagkan sa makadaghan. Ang Ginoo natandog pag-ayo sa iyang gibuhat ug giingnan niya ang babaye: “Ang imong pagtuo nagluwas kanimo; pauli nga malinawon.”

Ang estorya ning tulo ka makasasala angay nga magdasig kanato sa pag-ila sa atong pagkamasalaypon. Dili kita manundog kang Simon nga Pariseo, nga maayo lang motan-aw sa sala sa uban, apan wala makakita sa iyang kaugalingong mga sayop. Dili kita angay nga maghukom sa isigkatawo tungod kay kita usab makasasala man. Tawo lamang kita ug dili perpekto. Kon susihon nato pag-ayo ang atong kaugalingon, daghan kitag makita nga kasaypanan ug kasal-anan. Kon magpaubos kita ug modawat sa atong mga sala, maangkon nato ang kapasayloan ug kalinaw sa kinabuhi. Bisan pa og unsay atong nabuhat, maayo man o daotan, ang Ginoo nahigugma kanato sa hilabihan. Bisan pag unsa kadako ang atong mga sala, basta lamang basolan nato kini, maangkon nato ang pasaylo sa Ginoo.

Hinumduman nato nga ang Simbahan gimugna dili sa mga tawong walay sala kondili sa mga tawong nakasala ug napasaylo sa Ginoo. Matod pa, “The Church is not a museum for saints but a hospital for sinners.” Busa karon, gidasig kita nga moyaka sa tiilan sa Dios, sama sa babaye sa ebanghelyo, ug tagamtamon nato ang dakong gugma ug kalooy sa Ginoo.

Pamalandongan nato kini:

1. Unsa may atong batasan nga gipakita sa mga tawong masalaypon - nagmahukmanon ba kita o nagmasinabtanon?

2. Giunsa man nato pagtan-aw ang atong kaugalingon – tawo ba nga santos nga wala manginahanglan og kapasayloan o tawo nga makasasala nga nanginahanglan og kalooy sa Ginoo?

FEAST OF SAINT BARNABAS, APOSTLE

MATEO 10:7-13. KINSA MAN ANG GITAHASAN NGA MAGSANGYAW SA MAAYONG BALITA? Sa kapistahan ni San Bernabe apostol, kita gipahinumduman kalabot sa atong bokasyon isip mga binunyagan. Sama kang Bernabe, kita gipili aron mopadayon sa trabaho nga gisugdan sa mga apostoles – ang pagsangyaw mahitungod kang Kristo ngadto sa mga tawo. Aron mahimong epektibo, kinahanglan nga makamao kitang malimot sa kaugalingon ug maghunahuna sa kaayohan sa uban. Ang atong pagsangyaw ubanan gayod og pagpangalagad. Matod pa ni Pope Francis: “They are like the two sides of a medal. Those who proclaim Jesus are called to serve, and those who serve proclaim Jesus.” Ang usa ka sumusunod ni Kristo dili mahimong mosubay og laing dalan gawas sa dalan sa Magtutudlo, nga mianhi dili aron alagaran kondili aron mag-alagad.

FRIDAY OF THE 10TH WEEK IN ORDINARY TIME (YEAR C)

MATEO 5:27-32. UNSA MAY ATONG BUHATON SA MGA TAWO NGA MAGDANI KANATO SA PAGPAKASALA? Si Hesus miingon: “Kon ang imong tuong mata makaangin kanimo sa pagpakasala lugita kini ug ibalibag, kay mas maayo pa kanimo nga kawad-an ang imong lawas og usa ka bahin kaysa itambog ang tibuok mong lawas ngadto sa impyerno.” Kining maong panultihon dili angay sabton sa iyang mga letra kondili sa iyang nagpaluyo nga mensahe. Ang mga tawo nga magdasig kanato sa pagbuhat og daotan angay gayod natong likayan ug biyaan. Ang atong mga higala atong unongan sa maayong binuhatan, apan dili sa daotan. Si San Pablo nag-ingon: “Ayaw kamo patunto. Ang daotang mga kauban makadaot sa maayong pamatasan” (1 Cor 15:33). Sakto ang giingon, “We cannot hang out with bad people and expect a good, moral life.”

THURSDAY OF THE 10TH WEEK IN ORDINARY TIME (YEAR C)

MATEO 5:20-26. SENSITIBO BA KITA SA PAGBATI SA UBANG TAWO? Daghan kanato makabantay dayon sa kaugalingong pagbati, apan dili sa pagbati sa laing tawo. Dali kita masuko kon kita ang binuangan, apan sayon nato ang pagbinuang sa uban. Dili kini maayo. Si Hesus miingon: “Inigdala nimo sa imong halad sa Dios... ug didto mahinumdum ka nga nasilo ang imong isigkatawo, biyai ang imong halad atubangan sa halaran, ug pakig-uli una kaniya. Unya balik sa halaran ug ihalad ang imong halad sa Dios.” Kini ang pamaagi ni Hesus sa paghimo kanato nga mas sensitibo sa pagbati sa laing tawo. Ang paghunahuna sa pagbati sa uban usa ka ilhanan sa maayong pamatasan. Matod pa ni Emily Post: “Manners are a sensitive awareness of the feelings of others. If you have that awareness, you have good manners, no matter what fork you use.”

WEDNESDAY OF THE 10TH WEEK IN ORDINARY TIME (YEAR C)

MATEO 5:17-19. UNSAON MAN NATO PAGTAGAD ANG MGA BALAOD? Si Kristo nagtahod sa mga balaod ug andam siya nga mosunod niini subay sa ilang espiritu. Sa atong katilingban ug Simbahan karon adunay mga balaod nga gipahiluna alang sa kaayohan sa tanan. Isip mga sakop, kita adunay obligasyon sa pagsunod niini kutob sa atong mahimo. Ang pagtuman sa mga balaod, bisan sa pinakagamay niini, maoy usa ka pagpakita sa atong gugma sa Ginoo ug sa isigkatawo. Gani, ang ebanghelyo nag-awhag kanato dili lamang sa pagsunod sa balaod kondili sa pagtudlo usab niini ngadto sa uban. Ang maghimo niini “pagatawgon nga dako sa gingharian sa langit.” Sa pagtudlo, hinumduman nato ang giingon ni W.A. Ward: “The mediocre teacher tells. The good teacher explains. The superior teacher demonstrates. The great teacher inspires.”