TUESDAY OF THE 7TH WEEK IN ORDINARY TIME

MARCOS 9:30-37. DAOTAN BA ANG MAG-AMBISYON? Normal sa tawo nga mangandoy mo-asenso. Ang atong mga tinguha sa kinabuhi maoy magdasig kanato sa pagtrabaho ug pagpaningkamot. Apan, importante nga atong susihon ang matang ug tumong sa atong mga ambisyon. Unsa may atong ginadamgo? Naninguha ba kita nga motrabaho para sa kaayohan sa uban o naglantaw lamang kita sa atong personal nga interes? Diha sa ebanghelyo gipahimangnoan ni Kristo ang mga tinun-an sa pag-ingon: “Bisan kinsa ang buot nga mahimo nga labing dako kinahanglan nga magpaubos siya ug mag-alagad sa tanan.” Kini magdasig kanato sa pagtinguha sa pagkab-ot sa labing dakong ganti sa langit pinaagi sa pagpangalagad. Sakto ang gisulat: “The measure of a man’s greatness is not the number of servants he has, but the number of people he serves.”

MONDAY OF THE 7TH WEEK IN ORDINARY TIME

MARCOS 9:14-29. UNSA MAY ANGAY’NG BUHATON TALIWALA SA MGA PAGSUWAY SA KINABUHI? Usahay, ang atong pagtoo sa Dios pagasuwayon sa mga dagkong problema ug kasakitan. Aduna man gani panahon nga mawad-an kita’g paglaum ug pagsalig sa gahum sa Dios. Diha sa ebanghelyo, ang amahan sa usa ka bata nga giyawaan naghatag kanato’g maayong panig-ingnan sa pag-ampo: “Ginoo, tabangi ang akong gamay nga pagtoo.” Angay usab kitang mag-ampo niini tungod kay ang kinabuhi dinhi sa kalibotan dili sayon ug usahay lisod kaayo’ng dawaton. Matod pa sa inila nga Irish Fisherman’s Prayer: “Lord, be good to me. The ocean is so wide and my boat is so small.” Taliwala sa dakong lawod sa kinabuhi, mosalig kita nga ang tanang butang nga mahitabo adunay rason ug nga ang Ginoo magpatigayon sa tanan alang sa atong kaayohan.

7TH SUNDAY IN ORDINARY TIME

MATEO 5:38-45. UNSA MAY ANGAY NATONG BUHATON SA MGA KAAWAY O SA MGA TAWO NGA NAGHATAG KANATO’G KASAKIT? Panimaslan, pasakitan, paantoson, o dili man gani, patyon. Apan, kon kita mga tinuod nga sumusunod ni Kristo, dili kini ang angay natong buhaton. Sa mga gustong manimalos, si Kristo karon nagtambag: Try kindness, instead of retaliation. “Higugmaa ang imong kaaway. I-ampo sila nga nagpasakit kanimo.” Gisugo kini ni Hesus tungod kay kini ang makaayo kanato. Sa pagpasaylo, gilibre nato ang kaugalingon sa pagdumot ug sa kasuko, mga pagbati nga makadaot kanato. Sa pag-ampo alang sa kaaway, giluwas nato ang tawo gikan sa kaparotan ug gihunong nato ang panagbugno. Matod pa ni Abraham Lincoln: “The best way to destroy an enemy is make him a friend.”

FRIDAY OF THE 6TH WEEK IN ORDINARY TIME

MARCOS 8:34-9:1. UNSAON MAN PAGKAB-OT OG KINABUHING MALIPAYON? Si Hesus nag-ingon: “Ang buot moluwas sa iyang kaugalingong kinabuhi mawad-an hinoon niini; apan kadtong maghalad sa iyang kinabuhi alang kanako dili mawad-an niini.” Kining panultihon ni Kristo mapamatud-an diha sa atong kasinatian. Ang tawo nga maghunahuna lamang sa iyang kaugalingong interes magpuyo nga kulang sa kinabuhi. Wala siyay mahimong higala ug wala usab siyay madawat nga tinud-anay nga pagtagad o gugma. Sa laing bahin, ang tawo nga makamaong malimot sa kaugalingon alang sa kaayohan sa uban mapuno hinoon sa kinabuhi. Maiya ang daghang mga higala ug magpuyo siya nga puno sa pagdayeg ug paghigugma gikan sa uban. Sakto ang gisulti ni Albert Eisntein: “Only a life lived for others is a life worthwhile.”

THURSDAY OF THE 6TH WEEK IN ORDINARY TIME

MARCOS 8:27-33. UNSAON MAN NATO PAG-ILA SI KRISTO? Si Kristo nangutana: “Para kaninyo, kinsa man ako?”  Kining pangutana interesado dili sa atong nasayran kalabot ni Kristo kondili sa ato mismong pagkaila niya. Ang “pagkaila ni Kristo” atong makab-ot dili lamang pinaagi sa pagtambong og klase sa teolohiya, kondili labaw sa tanan, pinaagi sa atong pagpakig-uban kaniya diha sa pag-ampo, pagpamalandong ug pagpangalagad. Mao kini ang gitawag og personal nga pagpakigrelasyon uban sa Ginoo. Sama sa ubang matang sa relasyon, ang atong pagpakigsuod sa Ginoo molambo kon kita makamaong mohatag og igong panahon sa pagpakig-uban kaniya. Si Joyce Mayer nag-ingon, “When we enter into a personal relationship with Jesus, something wonderful happens: God begins to change our desires, and we want to become more like him.”

WEDNESDAY OF THE 6TH WEEK IN ORDINARY TIME

MARCOS 8:22-26. UNSA MAN ANG DIOSNONG PAAGI SA PAGLUWAS OG TAWO? Gihawiran ni Hesus ang kamut sa buta ug iya kining gidala ngadto sa gawas sa balangay. Dili lang kausa kondili kaduha niya gitapion ang iyang mga kamut sa mga mata niini. Human ayoha, gipinahan ni Hesus ang buta sa dili pagbalik sa balangay. Kining ebanghelyo usa ka nindot nga hulagway sa proseso sa Diosnong paagi sa pagluwas og tawo. Mahitabo kini dili sa usa ka pamilok lamang kondili sa hinayhinay nga paagi. Dapiton ang tawo sa pagbiya sa iyang daang kahimtang ug pagsugod og lakaw uban sa Ginoo. Dili kini sayon ug angay ubanan og igong pasensya ug dakong gugma. Ang pagpakaulaw ug pag-insulto og tawo dili buhat nga Diosnon. Adunay nag-ingon, “When you are tempted to lose patience with someone, think how patient God is with you all the time.”