MONDAY OF THE 15TH WEEK IN ORDINARY TIME (YEAR C)

MATEO 10:34-11:1. SA UNSA MANG PAAGIHA SI KRISTO MAGDALA’G KASAMOK UG PAGBAHINBAHIN DIHA SA PAMILYA UG KATILINGBAN? Ang pagka-Kristiyano magtawag kanato sa pagbarog alang sa kamatuoran, kaangayan ug katarong. Sa pagtuman nato niini, adunay mga tawo nga mahimo natong kaaway. Mahitabo kini tungod kay aduna may mga tawo nga dili matinud-anon, bintahoso, ug mapahimuslanon. Ang mga tawong Kristohanon maoy mahimong babag sa ilang mga daotang plano ug tinguha. Pananglitan, usa ka empleyado sa munisipyo ang nahimong kaaway sa iyang mga kauban tungod kay dili siya moapil sa ilang buhat nga pagpangurakot. Kini tingali ang gipasabot ni Winston Churchhill sa iyang pag-ingon: “You have enemies? Good. That means you stood up for something, sometime in your life.”

15TH SUNDAY IN ORDINARY TIME (YEAR C)

Lukas 10:25-37

Kinsa man ang atong matawag nga silingan?

Para sa kadaghanan, ang silingan mao kadtong nagpuyo duol sa atong balay. Apan, ang mga Hudiyo adunay laing pagsabot sa silingan. Una sa tanan, ang silingan mao ang ilang isig ka Hudiyo, bisan kon hain kini nagpuyo. Dugang pa niini, ila usab nga isipong silingan ang mga hentil nga nahimong Hudiyo (converts to Judaism). Sa ato pa, giila sa mga Hudiyo nga silingan kadtong parehas nila og lahi o parehas nila og pagtoo.

Gipangutana si Hesus sa usa ka magtutudlo sa balaod, “Kinsa man ang akong silingan?” Iya kining gitubag pinaagi sa paghatag sa sambingay sa Maayong Samariyanhon. Ang maong sambingay dili makalipay sa mga Hudiyo. Ngano man? Diha sa sugilanon, ang pari ug ang Levita, nga labing tinahud sa mga Hudiyo, wala malooy ug wala motabang sa nagkadugo nga biktima sa mga tulisan. Apan ang Samariyanhon, nga giila sa mga Hudiyo nga hugaw ug daotang tawo, mibati og dakong kalooy ug miluwas sa tawo nga himalatyon.

Sa katapusan sa sambingay, ang Samariyanhon gidayeg tungod kay siya nagpakita man og dakong kalooy ug mitabang sa tawo nga himalatyon diha sa dalan. Para sa Ginoong Hesus, ang matawag nga silingan dili kadtong tawo nga duol kanato’g balay o managsama kanato’g lahi o pagtoo, kondili kadtong mga tawo nga adunay panginahanglan. Ang tawo nga nagkalisud atong silingan. Kon kita motabang sa maong tawo, pagailhon kita sa Ginoo nga Buotang Silingan sa maong tawo.

Aron mabati nato ang gibug-aton sa mensahe ning maong sambingay, maghimo kita’g susamang sugilanon nga puwedeng mahitabo dinhi sa ato.

Dihay usa ka batan-on nga babaye nga naglingkod ug nagsigi og hilak sulod sa merkado. Nalabyan siya sa usa ka pari ug gipangutana, “Inday nganong naghilak ka man?” Ug mitubag ang babaye, “Padre, gikuotan ako sa pitaka. Nawala ang kwarta nga ako untang ipalit og tambal para sa akong inahan nga masakiton. Unsaon na lang ni karon.” Ang pari miingon, “Pastilan, gadanghag man sab ka. Sa sunod magbantay na ka pagsulod sa merkado kay daghang mangunguot dinhi. Ayaw nag punay og hilak diha kay wala ka nay mahimo. Pauli na lang sa inyo. I-ampo nako nga mamaayo ra ang imong nanay.”

Human makalakaw ang pari, nalabyan usab sa usa ka lay minister ang babaye nga naghilak pa gihapon. “Inday, nganong naghilak ka man?” nangutana ang lay minister. Sa samang paagi, gisugilon sa babaye ang nahitabo. Unya miingon ang lay minister, “Inday, pauli na lang sa inyo. Ako nay bahalang mopahimangno sa mga pulis aron manakop sa mga mangunguot ning merkado.”

Nahitabo nga dihay tindero nga Muslim duol sa gilingkoran sa babaye. Nadungog niya ang gisulti sa babaye mahitungod sa nahitabo kaniya. Ug nalooy siya pag-ayo sa babaye nga biktima sa pagpanguot. Unya, miduol siya ug giingnan ang babaye: “Inday, palihog dawata kining akong gamay nga tabang para sa imong nanay nga masakiton.” Dayon gitunol niya ang P1,000 ngadto sa babaye.

Pangutana: Kinsa man para kanato ang nagbuhat sa kabubut-on sa Dios – ang pari, ang lay minister o ang Muslim nga tindero? Kon moingon kita nga ang Muslim nga tindero maoy nagbuhat sa angay nga buhaton, ato nga gidawat nga bisan kinsa puwede nga mohimo og maayong buhat. Kining ebanghelyo karon magdasig kanato, una sa tanan, nga mahimong maayong mga silingan sa mga tawong adunay panginahanglan. Dili unta kita mobati lamang og kalooy kondili molihok aron sa pagtabang sa mga naglisod. Ug ikaduha, ang ebanghelyo magdasig usab kanato nga wagtangon ang mga daotang hunahuna ug pagbati sa mga tawo nga lahi kanato og pagtoo. Kristiyano, Muslim, Buddhist, o si bisan kinsa, adunay kapasidad nga mahimong dalaygon nga anak sa Dios, o buotang Samaritano.

Pamalandongan nato kini:

1. Nahimo ba kitang maayong silingan sa mga tawo nga adunay panginahanglan?

2. Unsa may atong buhaton aron mawala ang atong mga daotang hunahuna ug pagbati sa mga tawo nga lahi og relihiyon o tinuohan?

SATURDAY OF THE 14TH WEEK IN ORDINARY TIME (YEAR C)

MATEO 10:24-33. ANGAY BA NATONG KAHADLOKAN ANG GINOO? Adunay duha ka matang sa kahadlok. Ang una mao ang kahadlok isip pagbati sa kalisang tungod sa usa ka katalagman o kasakitan nga nahitabo, nagakahitabo, o mahitabo pa. Ug ang ikaduha mao ang kahadlok isip pagbati sa dakong pagtahod ug pagkahingangha sa gahum ug kaayo sa usa ka persona. Sa pag-ingon ni Hesus “Kahadloki ninyo ang Dios”, wala niya ipasabot nga angay kitang malisang sa Dios. Hinoon, buot niya kitang dasigon sa pagpakita og dakong respeto ug pagtahod sa Dios. Ang Dios maoy labing gamhanan; sa Iyang mga kamot anaa ang gahum sa paglaglag ug pagluwas. Ang Panultihon 9:10 nag-ingon: “The fear of the Lord is the beginning of wisdom and knowledge of the Holy One is understanding.”

FRIDAY OF THE 14TH WEEK IN ORDINARY TIME (YEAR C)

MATEO 10:16-21. ASA MAN MAGAGIKAN ANG KALUWASAN SA MGA MATARONG? Ang karnero usa ka matang sa mananap nga walay ikapanalipod batok sa daghang mga butang – sama sa makahilo nga sagbot, sakit, insekto, ug ilabina sa mga lobo. Ginaingon nga ang usa ka lobo pwede nga makapatay og gatosan ka mga karnero sa usa lamang ka gabii. Sa pag-ingon ni Hesus, “Sama kamo sa karnero nga gipadala ngadto sa mga lobo”, buot lamang niyang ipasabot nga ang pagsangyaw sa ebanghelyo ngadto sa kalibotan dili gyod sayon. Sa atong pagsaksi kang Kristo pinaagi sa pulong ug sa buhat, pwede kita nga lutoson, pasakitan, o kaha patyon. Busa, sa atong pagpuyo sa Kristohanong kinabuhi, dili kita angay’ng magsalig sa kaugalingong katakos kondili sa gahum ug panabang sa Dios. Matod pa sa Salmo 37:39, “The salvation of the just comes from the Lord.”

THURSDAY OF THE 14TH WEEK IN ORDINARY TIME (YEAR C)

MATEO 10:7-15. NGANONG ANGAY MAN KITANG MAGMANGGIHATAGON? Si Hesus nag-ingon, “Nakadawat kamo nga walay bayad; busa, panghatag kamo nga walay bayad.” Tinuod, ang tanan natong bahandi – kwarta, talento, abilidad, trabaho, pamilya, ug mga higala – nagagikan sa Dios ug wala pabayri tungod kay kini iya mang gasa para kanato. Apan, atong hinumduman nga ang mga bahandi gihatag dili aron gamiton para sa kaugalingon lamang kondili aron itabang usab sa nanginahanglan. Dili kita mahadlok sa pagtabang tungod kay wala pay tawong napobre tungod sa pagkamatinabangon. Ang tawo nga manggihatagon mosamot kabahandianon; samtang ang tawo nga magsigi’g tigum para sakaugalingon mag-antos sa kawad-on. Adunay caption nga nag-ingon, “When you open your heart to giving, angels fly to your door.”

WEDNESDAY OF THE 14TH WEEK IN ORDINARY TIME (YEAR C)

MATEO 10:1-7. NGANONG MGA SIMPLENG TAWO MAN ANG PILI-ON NI KRISTO ARON MAHIMO NIYANG MGA APOSTOLES O MAGSASANGYAW? Adunay pipila ka mga posibleng hinungdan. Una, ang mga simpleng tawo adunay daghang panahon para sa Ginoo; dili sila kargado sa mga kalibotanong panginahanglan o kabalaka. Ikaduha, ang mga tawong simple dali ra nga sugoon; dili sila garboso ug dili gahi'g ulo. Ikatulo, ang mga simpleng tawo abli sa bag-ong pagtulon-an; dali ra silang magiyahan sa Espiritu Santo. Ug ikaupat, ang mga tawong simple dili magsalig sa ilang bahandi, gahum ug kaantigohan. Ang ilang dakong pagsalig anaa sa Ginoo, ug tungod niini, daghan sila'g mahimo. Adunay nindot caption nga nagkanayon: “God has a habit of picking up nobodies and making them somebodies.”