WEDNESDAY OF THE 23RD WEEK IN ORDINARY TIME (YEAR C)

LUKAS 6:20-26. PROBLEMA BA ANG BAHANDI? Sa pagkatinuod, ang bahandi dili maoy problema kondili ang tawo. Kita ang dili makamaong mogamit sa mga butang ning kalibotan. Dali ra kitang mahimong laog, ug tungod niini, dili kita mopaambit sa unsay ato ngadto sa uban. Tungod sa kagustohan nga modaghan ang bahandi, mamintaha kita ug manikas. Imbis makatabang, ang bahandi mao na hinooy hinungdan sa pagkadaot sa atong relasyon sa Dios ug sa isigkaingon. Ang tawo maglisod gayod pagsulod sa langit kon dili siya makat-on pagbiya sa iyang bahandi. Huot ang pultahan sa langit dili tungod kay kini gamay kondili tungod kay ang masulod niini mao lamang ang maayong pagkatawo ug binuhatan, dili ang kalibotanong mga butang. Sakto ang giingon ni Bertie C. Forbes, “Real riches are the riches possessed inside.”