Lukas 12:32-48
Adunay usa ka tawo nga dato kaayo. Nagtoo siya nga
ang salapi maoy labing importante tungod kay pinaagi niini makab-ot niya ang
tanan. Ingon niini ang iyang kasinatian sa kalibutan. Ang tanang butang ug tawo
nga iyang magustohan iyang angkonon pinaagi sa salapi.
Sa dihang haduol na ang iyang kamatayon,
gitugon niya ang iyang mga anak nga pun-on og daghang salapi ang iyang lungon
aron iyang balonon didto sa langit. “Siguroha nga tag-libo ug dili sensilyo ang
ipadala nako”, kini ang iyang sugo.
Tuod man namatay ang dato ug mihalin sa laing
kalibutan. Didto sa langit, ang una niyang nakita mao ang dako ug nindot kaayo
nga Mall. Busa wala siya maglangan, misulod siya sa Mall ug namili sa iyang mga
paborito nga mga sinina, pantalon, sapatos, ug uban pang gamit. Unya iyang
gidala sa counter ang tanan niyang nagustohan aron bayran. Apan ang anghel nga
cashier midumili pagdawat sa iyang linibo nga kwarta. “Tinuod kining akong
salapi ug dili kini fake!” masuk-anon ang dato nga nakiglalis sa anghel. Apan
ang anghel miingon kaniya, “Sir, dinhi sa langit, dili madawat ang imong
tag-libo. Papel ra man kana ug walay bili diri.” Naglibog ang dato ug
nangutana, “Unya, unsa may akong ibayad aning akong mga nagustohan?” Ug ang
anghel nitubag, “Atong tan-awon kon aduna bay pundo ang imong ‘goodness
account’. Sa matag higayon nga ikaw nagtabang o nagbuhat og maayo para sa kabos
ug naglisod, adunay pundo nga masulod sa imong goodness account. Ug kini maoy
magsilbing kwarta nga magamit nimo dinhi sa langit.” Taudtaud, nagpanglingo ang
anghel ug giingnan niya ang dato: “Sir, pagkapobre nimo nga tawo. Wala gyoy
sulod ang imong goodness account ug dili ka makabayad anang imong gustong
paliton.” Ug masulob-on kaayo ang dato nga milakaw nga nakaamgo sa iyang
kapobrehon.
Sa Ebanghelyo karon, Si Hesus nag-agni kanato
sa pagtigum og bahandi nga langitnon, dili bahandi nga kalibotanon. Ang bahandi
nga kalibotanon madunot, makawat, ug dili madala sa Gingharian sa Dios. Samtang
ang bahandi nga langitnon dili mapapas, dili mahilabtan sa kawatan, ug mag-uban
kanimo hangtod sa kahangtoran. Unsa man diay ang langitnong bahandi? Si San
Pablo nagtambag: “Sultihi sila sa pagbuhat og maayo ug sa pagpadato diha sa
maayong binuhatan, sa pagkamahinatagon ug sa pagtabang sa uban. Niining paagiha
makatigom sila og bahandi nga mahimo nilang lig-on nga sukaranan alang sa
umaabot ug maangkon unya nila ang kinabuhing dayon” (1 Tim 6:18-19). Sa ato pa,
ang langitnong bahandi sa tawo mao ang iyang katarong ug maayong binuhatan;
kini ang magdala kaniya og kaluwasan. Ang
Panultihon 11:4 nag-ingon, “Ang kalibotanong bahandi dili magpulos kanimo sa
adlaw nga ikaw hapit na mamatay, apan ang katarong magluwas kanimo gikan sa
kamatayon.”
Unsa may atong gipakabahandi sa kinabuhi? Si
Kristo nag-ingon: “Kon asa ang imong bahandi atua usab ang imong kasingkasing.”
Nga sa ato pa, masayran nato kon unsay atong gipakabahandi pinaagi sa pagsusi
kon asa man nato igahin ang atong hunahuna ug pagbati sa matag adlaw. Kon ang
atong panahon mahurot lang sa pagtrabaho ug pagnegosyo, nan ang atong
gipakabahandi mao ang salapi. Kon ang atong panahon mahurot sa barkada ug
lulinghayaw, nan klaro kaayo nga gipakabahandi nato ang kahilayan. Apan, kon
ang atong adlaw gibahin og maayo sa pagtrabaho, pag-atiman sa pamilya,
pagpakighigala, pagpangalagad, ug pag-ampo, nan klaro nga gipakabahandi nato
ang maayong relasyon uban sa Ginoo ug sa isigkatawo.
Ang ebanghelyo nagdasig kanato nga mahimong
mga buotang piniyalan sa Dios. Sa unsa mang mga paagi? Una, kinahanglan nga ilhon
nato ang Dios nga maoy tag-iya sa tanan ning kalibotan, apil ang atong
kinabuhi. Ikaduha, atong ampingan ug gamiton sa maayong paagi ang mga gasa ug
bahandi nga atong nadawat gikan sa Dios. Ang kinaiyahan dili nato usikan ug
abusohan. Ikatulo, atong gamiton ang atong panahon, talento ug bahandi sa
pagpasidungog sa Dios ug sa pagtabang sa isigkaingon. Dili kita maglinaog ug
maghunahuna sa kaugalingon lamang. Ug sa katapusan, kinahanglan maghatag kita
og maayong ehemplo sa uban aron sa ingon mahimo kitang suga nga maglamdag ning
kalibotan. Ingon niini ang buotang piniyalan sa Dios. Bulahan siya tungod kay
sa pag-abot sa Dios, nga maoy tag-iya sa tanan, silbihan ug busgon niya siya,
ug tugyanan pa gayod sa dagkong mga butang sa Gingharian.
Pamalandongan nato kini:
1. Unsa may atong gipakabahandi ning
kalibotan? Unsa may atong gitigum sa matag adlaw – bahanding kalibotanon o
bahanding langitnon?
2. Unsa may atong buhaton aron mahimong dato
sa Gingharian sa Dios?
No comments:
Post a Comment